या प्रकारामुळे पोलिस दलाच्या प्रतिमेला मोठा धक्का बसला असून, संबंधित अधिकार्‍यावर तत्काळ निलंबनाची कारवाई करण्यात आली आहे.
मिळालेल्या माहितीनुसार, राजेश जाधव नावाचे सहायक पोलिस उपनिरीक्षक यांनी कोठडीत असलेल्या एका महिलेकडे तिच्या मुलीला शरीरसुखासाठी पाठवण्याची मागणी केली. या बदल्यात दहा हजार रुपयांचे आमिषही दाखवण्यात आल्याचा आरोप आहे. संबंधित महिला आर्थिक फसवणुकीच्या प्रकरणात अटकेत होती आणि तिला सिव्हिल लाईन पोलिस ठाण्यात ठेवण्यात आले होते. याच काळात हा प्रकार घडल्याचे सांगितले जाते. या घटनेने संतप्त झालेल्या महिलेने वरिष्ठ पोलिस अधिकार्‍यांकडे तक्रार केली. तक्रार मिळताच वरिष्ठांनी तातडीने हस्तक्षेप करत प्रकरणाची गंभीर दखल घेतली. आरोपी अधिकार्‍याची चौकशी करण्यात आली असता, त्याला सर्वांसमोर खडसावण्यात आले. वर्दीचा मान राखला नाही, अशी तीव्र शब्दांत त्याची कानउघाडणी करण्यात आल्याचे समजते. या घटनेचा एक व्हिडिओ समाजमाध्यमांवर मोठ्या प्रमाणावर प्रसारित होत असून, त्यात वरिष्ठ अधिकारी आरोपीला जाब विचारताना दिसतात. दरम्यान, पोलिस प्रशासनाने या प्रकरणात विलंब न करता कारवाई करत राजेश जाधव यांना निलंबित केले आहे. तसेच त्यांच्याविरोधात विनयभंगाचा गुन्हा दाखल करण्यात आला आहे. पुढील चौकशी सुरू असून, दोषींवर कठोर कारवाई होणार असल्याचे संकेत प्रशासनाकडून देण्यात आले आहेत.