लोकशाही न्यूज नेटवर्क
सांगली जिल्ह्यातील मिरज तालुक्यातील आरग परिसरात मोठी चोरीची घटना उघडकीस आली आहे. जिओ कंपनीचा तब्बल १९ लाख ६० हजार रुपये किमतीचा मोबाइल टॉवर सेट अज्ञात चोरट्यांनी लंपास केल्याने परिसरात खळबळ उडाली आहे.
ही घटना आरग येथील शेतकरी देवदास माने यांच्या शेतजमिनीत रस्त्यालगत उभारण्यात आलेल्या टॉवरवर घडली. ६ मे ते ११ मे या कालावधीत अज्ञात चोरट्यांनी संधी साधून संपूर्ण टॉवर सेट उचलून नेल्याची माहिती समोर आली आहे. एवढ्या मोठ्या आणि वजनदार उपकरणाची चोरी झाल्याने हा प्रकार नियोजनबद्ध टोळीचा असल्याचा संशय व्यक्त केला जात आहे.
या प्रकरणी विशाल प्रभाकर चव्हाण यांनी मिरज ग्रामीण पोलीस ठाण्यात तक्रार दाखल केली आहे. त्यानुसार पोलिसांनी अज्ञातांविरोधात गुन्हा नोंदवला असून तपास सुरू केला आहे. घटनास्थळी पंचनामा करण्यात आला असून परिसरातील सीसीटीव्ही फुटेज तपासले जात आहे.
पोलिसांच्या प्राथमिक अंदाजानुसार या चोरीसाठी मोठ्या वाहनाचा वापर करण्यात आला असण्याची शक्यता आहे. त्या दिशेनेही तपास सुरू असून वाहनांच्या हालचालींची माहिती गोळा केली जात आहे. दरम्यान, ग्रामीण भागात अशा प्रकारे मोठ्या प्रमाणावर चोरीची घटना घडल्याने नागरिकांमध्ये चिंतेचे वातावरण निर्माण झाले आहे. आरोपींना लवकर अटक करून मुद्देमाल हस्तगत करावा, अशी मागणी स्थानिकांकडून केली जात आहे.