रावेर

रावेर शहरातील ऐतिहासिक आणि प्राचीन श्री लक्ष्मीनारायण मंदिराला मध्यरात्री भीषण आग लागून मंदिर मोठ्या प्रमाणात जळून खाक झाले. या घटनेमुळे शहरात हळहळ व्यक्त होत असून भाविकांमध्ये शोककळा पसरली आहे.

मिळालेल्या माहितीनुसार, रात्री अंदाजे एक वाजेच्या सुमारास मंदिरातून धूर आणि आगीच्या ज्वाळा दिसून आल्याने परिसरातील नागरिकांनी तत्काळ धाव घेतली. मंदिराला आग लागल्याची बातमी वाऱ्यासारखी शहरभर पसरताच मोठ्या संख्येने नागरिकांनी घटनास्थळी गर्दी केली. सन १७०० च्या सुमारास बांधण्यात आलेले श्री लक्ष्मीनारायण मंदिर हे रावेर शहरातील सर्वात जुन्या आणि ऐतिहासिक मंदिरांपैकी एक मानले जाते. संपूर्ण सागवान लाकडापासून उभारण्यात आलेल्या या मंदिरावर अत्यंत सुंदर आणि आकर्षक नक्षीकाम करण्यात आले होते. मंदिरातील जुने नक्षीदार सागवान लाकूड तसेच आतील अनेक भाग आगीत पूर्णपणे जळून खाक झाले.

माता लक्ष्मी आणि भगवान नारायण यांच्या मनमोहक मूर्ती असलेल्या या मंदिराचे धार्मिक आणि ऐतिहासिक महत्त्व मोठे होते. मंदिराची भव्य रचना आणि कलात्मक बांधणी हे शहराचे आकर्षण मानले जात होते. त्यामुळे मंदिर जळाल्याची घटना नागरिकांसाठी अत्यंत धक्कादायक ठरली आहे. दरम्यान, रावेर, सावदा आणि फैजपूर नगरपालिकांच्या अग्निशमन दलाने घटनास्थळी धाव घेत अनेक तासांच्या प्रयत्नांनंतर आग आटोक्यात आणली. सुदैवाने या घटनेत कोणतीही जीवितहानी झाल्याचे वृत्त नाही. आग नेमकी कशामुळे लागली याचे कारण अद्याप स्पष्ट झाले नसून संबंधित यंत्रणांकडून तपास सुरू करण्यात आला आहे.