गतविजेता रॉयल चॅलेंजर्स बंगळूरुला (आरसीबी) मोठा धक्का बसला आहे. त्यांचा सलामीवीर फिल सॉल्ट बोटाच्या दुखापतीवर स्कॅन करण्यासाठी यूकेला परतला आहे. या दुखापतीमुळे तो सध्या सुरू असलेल्या इंडियन प्रीमियर लीग (आयपीएल) २०२६ हंगामातील संघाच्या काही सामन्यांना मुकण्याची शक्यता आहे.

मिळालेल्या माहितीनुसार, सॉल्टची दुखापत किती गंभीर हे सध्या आरसीबीने सांगितले नाही, मात्र तो दुखापतीमुळे आरसीबीच्या शेवटच्या तीन सामन्यांमधून बाहेर झाला. त्याला १८ एप्रिलला दिल्ली कॅपिटल्सविरुद्ध घरच्या सामन्यादरम्यान सीमारेषेजवळ चेंडू अडवण्याच्या प्रयत्नात दुखापत झाली होती. ही दुखापत होण्याआधी त्याने संघासाठी उत्तम कामगिरी केली. त्याने सहा डावांमध्ये १६८.३३ च्या स्ट्राईक रेटने २०२ धावा केल्या. त्याने अनेक सामन्यांमध्ये आरसीबीला आक्रमक सुरूवात करून दिली आहे.

सॉल्टची दुखापत वेळेत बरी होईल आणि तो लवकरच संघात परतेल, अशी आशा आरसीबीला आहे. तो मे महिन्याच्या अखेरीस भारतात परतण्याची शक्यता आहे. संघाला सध्या त्याची आवश्यकता असून त्याची ही दुखापत होण्याची वेळ दुर्दैवी ठरली आहे. त्याने इंग्लंडसोबतच्या निराशाजनक टी२० विश्वचषक २०२६ नंतर आयपीएलमध्ये आपला फॉर्म मिळवला होता आणि तो चांगली कामगिरीही करत होता.