आयपीएल २०२६ मध्ये रविवारी (३ मे) अहमदाबादच्या मैदानावर गुजरात टायटन्स आणि पंजाब किंग्ज भिडले. शेवटच्या षटकापर्यंत रंगलेल्या या सामन्यात जीटीने बाजी मारली. त्यांचा सलामीवीर साई सुदर्शनने पुन्हा एकदा संघाला उत्तम सुरूवात करून देताना अर्धशतकी खेळी केली आणि स्पर्धेच्या इतिहासातील क्रिस गेलचा बलाढ्य विक्रम मोडला.

आयपीएलच्या इतिहासात ५० सामन्यानंतर सर्वाधिक धावा करण्याचा गेलचा विक्रम सुदर्शनने मोडला आहे. त्याने पीबीकेएस विरुद्ध ४१ चेंडूत ५७ धावा करत हा टप्पा गाठला आहे. या कामगिरीसह सुदर्शनने आपल्या पहिल्या ५० आयपीएल डावांमध्ये २१७८ धावा करत गेलचा २०६१ धावांचा जुना विक्रम मोडीत काढला आहे. हा विक्रम १३ वर्षे कोणालाही मोडता आला नव्हता. या यादीत तिसऱ्या स्थानावर मिचेल मार्श असून त्याने १९३३ धावा केल्या आहेत.

सुदर्शनने गेलचा मोठा विक्रम मोडण्याची ही काही पहिलीच वेळ नाही. त्याने नुकतेच आयपीएलच्या इतिहासात सर्वात जलद २००० धावा करण्याचा विक्रमही आपल्या नावे केला. त्याने हा टप्पा गेलच्या ४८ डावांपेक्षा केवळ ४७ डावांत गाठला. मार्शने ५२ डावांमध्ये ही कामगिरी केली.

पहिल्या सहा डावांमध्ये केवळ एक अर्धशतक यावरून सुदर्शनची आयपीएल २०२६ ची सुरूवात संथ गतीने झाली. आता त्याने जोरदार पुनरागमन करत आपल्या शेवटच्या चार डावांमध्ये तीन वेळा पन्नास पेक्षा अधिक धावा केल्या आहेत. त्याने २०२२ मध्ये पदार्पण केल्यापासून जीटीकडून ५० डावांमध्ये ४७.३४ च्या सरासरीने आणि १४८ च्या स्ट्राईक रेटने २१७८ धावा केल्या आहेत.

पीबीकेएस विरुद्धच्या सामन्यात जीटीने नाणेफेक जिंकत प्रथम गोलंदाजी केली. जेसन होल्डरच्या २४ धावांत ४ विकेट्स, मोहम्मद सिराजच्या २८ धावांत २ विकेट्स आणि कगिसो रबाडाच्या २२ धावांत २ विकेट्स या उत्कृष्ट कामगिरीच्या जोरावर जीटीने पीबीकेएसच्या स्फोटक फलंदाजी फळीला २० षटकात १६३/९ धावसंख्येवर रोखले.