पुणे : पुण्यात झालेल्या भाजपच्या प्रदेश कार्यसमितीच्या बैठकीत मुख्यमंत्री देवेंद्र फडणवीस यांनी सुमारे १ तास २० मिनिटे संवाद साधत पक्षाचे पदाधिकारी आणि कार्यकर्त्यांना आगामी राजकीय वाटचालीसाठी दिशा दिली.
गणेशोत्सवातील डीजेचा वाद, 'सीजेपी'च्या माध्यमातून भाजपविरोधात सुरू असलेल्या कथित मोहिमा, हिंदुत्व आणि राम मंदिराचा मुद्दा, नाशिकच्या कुंभमेळ्याबाबतचे कथित 'नरेटिव्ह', तसेच सोशल मीडियातील बदलते राजकारण अशा विविध मुद्द्यांवर फडणवीस यांनी भाष्य केले.
'राजकारणाची साधने बदलली आहेत, त्यामुळे कार्यपद्धतीही बदलली पाहिजे,' हा त्यांच्या भाषणाचा केंद्रबिंदू राहिला. विशेषतः तरुण पिढीपर्यंत पोहोचण्यासाठी इन्स्टाग्राम आणि ४० ते ६० सेकंदांच्या व्हिडिओ कंटेंटवर भर देण्याचे आवाहन त्यांनी कार्यकर्त्यांना केले.
१. पुण्याने सांस्कृतिक गणेशोत्सवाचा आदर्श घालावा
गणेशोत्सवात डीजे असावा की नसावा, या वादात न पडता पुणेकरांनी सांस्कृतिक आणि पारंपरिक पद्धतीने उत्सव साजरा करून महाराष्ट्रासमोर आदर्श निर्माण करावा, असे आवाहन फडणवीस यांनी केले.
२. 'सीजेपी'वर फडणवीसांचा थेट हल्लाबोल
'सीजेपी' म्हणजे 'काँग्रेस जिताओ प्रोग्रॅम' असल्याचा दावा करत फडणवीस यांनी या संघटनेच्या माध्यमातून भाजपविरोधात राजकीय वातावरण तयार केले जात असल्याची टीका केली.
३. 'भारत जोडो'तील १८० संघटनांचा संदर्भ
'भारत जोडो' यात्रेदरम्यान एकत्र आलेल्या सुमारे १८० संघटनांपैकी अनेक संघटना आता नव्या नावाने भाजपविरोधात सक्रिय झाल्याचा आरोप त्यांनी केला.
४. 'फेक नरेटिव्ह'विरोधात आक्रमक रणनीतीची गरज
विरोधकांकडून तयार केल्या जाणाऱ्या कथित 'फेक नरेटिव्ह'ला उत्तर देण्यासाठी भाजपची संवाद आणि प्रचाराची कार्यपद्धती अधिक प्रभावी व आधुनिक करण्याची गरज असल्याचे त्यांनी सांगितले.
५. राजकारणाचे मैदान आता सोशल मीडिया
तरुण पिढी टीव्ही आणि वर्तमानपत्रांपेक्षा मोबाईलवर अधिक सक्रिय आहे. त्यामुळे डिजिटल माध्यमे हेच जनतेपर्यंत पोहोचण्याचे महत्त्वाचे माध्यम बनले असल्याचे फडणवीस यांनी अधोरेखित केले.
६. फेसबुकच्या पुढे जा, इन्स्टाग्रामवर सक्रिय व्हा
भाजपच्या अनेक कार्यकर्त्यांचे लक्ष अद्याप फेसबुकवर केंद्रित असल्याचे सांगत इन्स्टाग्रामसारख्या नव्या माध्यमांवर अधिक सक्रिय होण्याचा सल्ला त्यांनी दिला.
७. ४० ते ६० सेकंदांच्या व्हिडिओची ताकद
आजच्या तरुण पिढीपर्यंत पोहोचण्यासाठी लहान, नेमका आणि वेगवान व्हिडिओ कंटेंट प्रभावी ठरत असल्याचे फडणवीस यांनी सांगितले.
८. 'ज्याचं अस्त्र, त्याच अस्त्राने उत्तर'
विरोधक ज्या माध्यमांचा वापर करून नरेटिव्ह तयार करतात, त्याच माध्यमांचा अधिक प्रभावीपणे वापर करून त्याला उत्तर द्यावे, असा स्पष्ट संदेश कार्यकर्त्यांना देण्यात आला.
९. हिंदुत्व आणि राम मंदिराच्या मुद्द्यावर विरोधकांवर निशाणा
भाजपच्या हिंदुत्वाच्या विचारसरणीला आणि राम मंदिराला विरोध करूनही राजकीय यश मिळाले नाही. त्यामुळे नवे मुद्दे पुढे करून कथानक तयार करण्याचा प्रयत्न होत असल्याचा आरोप फडणवीस यांनी केला.
१०. नाशिकच्या कुंभमेळ्याचा मुद्दा
राम मंदिरानंतर आता नाशिकच्या कुंभमेळ्याच्या कामाबाबतही विरोधकांकडून नकारात्मक नरेटिव्ह तयार केले जात असल्याचा दावा त्यांनी केला.
११. भारताच्या वाढत्या प्रभावावर जागतिक शक्तींचा संदर्भ
भारत आत्मनिर्भर आणि शक्तिशाली होत असल्यामुळे काही जागतिक शक्तींना ते मान्य नसल्याचा दावा करत भारताला रोखण्यासाठी विविध पातळ्यांवर प्रयत्न होत असल्याचे फडणवीस यांनी सांगितले.
१२. 'मोहरा' म्हणून वापरले जात असल्याचा आरोप
विरोधकांच्या कथित मोहिमेत सहभागी असलेल्या अनेकांना आपला वापर केला जात असल्याची जाणीव नसते, असे फडणवीस म्हणाले.
१३. रामायणातील 'काल'चा दाखला
वेगवेगळे चेहरे आणि वेष घेऊन येणाऱ्या शक्तींचा संदर्भ देताना फडणवीस यांनी रामायणातील 'काल'चा दाखला देत राजकीय विरोधकांवर टीका केली.
१४. 'रामाचे नाव नव्हे, रामाची तत्त्वे'
केवळ प्रभू श्रीरामांचे नाव घेणे महत्त्वाचे नाही, तर रामाने दिलेल्या मूल्यांच्या आधारे राज्यकारभार करण्याचा प्रयत्न केला पाहिजे, असे फडणवीस यांनी स्पष्ट केले.
१५. 'वंदे मातरम्'चा गौरव
'वंदे मातरम्' हे मातृभूमी आणि मातृशक्तीचे प्रभावी प्रतीक असल्याचे सांगत फडणवीस यांनी त्याचे महत्त्व अधोरेखित केले.
१६. महिला आरक्षणावर काँग्रेसला लक्ष्य
महिला आरक्षणाच्या मुद्द्यावर काँग्रेस आणि तत्कालीन यूपीएतील घटक पक्षांनी अडथळे आणल्याचा आरोप त्यांनी केला.
१७. राहुल गांधींच्या पुण्यातील कार्यक्रमावर टीका
राहुल गांधी यांच्या पुण्यातील कार्यक्रमाचा उल्लेख करत फडणवीस यांनी त्याला 'झूट की गूंज' असे संबोधत विरोधकांच्या प्रचारपद्धतीवर निशाणा साधला.
१८. काँग्रेसकडून अराजक निर्माण करण्याचा आरोप
काँग्रेसवर देशात आणि राज्यात अराजकतेचे वातावरण निर्माण करण्याचा प्रयत्न केल्याचा गंभीर आरोप फडणवीस यांनी केला.
१९. डॉ. बाबासाहेब आंबेडकरांच्या विचारांचा संदर्भ
राज्यघटनेच्या नावाखाली अराजकता पसरवण्याचा प्रयत्न होत असल्याची टीका करताना डॉ. बाबासाहेब आंबेडकरांनी अराजकतेबाबत दिलेल्या इशाऱ्याचा संदर्भ त्यांनी दिला.
२०. कार्यकर्त्यांना स्पष्ट 'अॅक्शन पॉइंट'
फडणवीस यांच्या भाषणाचा सर्वात महत्त्वाचा संदेश म्हणजे पक्षाच्या पारंपरिक कार्यपद्धतीत बदल करणे. जनसंपर्क, सोशल मीडिया, डिजिटल कंटेंट आणि नरेटिव्हच्या लढाईत भाजपच्या कार्यकर्त्यांनी अधिक वेगवान आणि प्रभावी पद्धतीने काम करावे, असे आवाहन त्यांनी केले.
गणेशोत्सवातील डीजेच्या वादापासून सोशल मीडिया स्ट्रॅटेजीपर्यंत आणि 'सीजेपी'पासून हिंदुत्वाच्या राजकारणापर्यंत… फडणवीसांच्या १ तास ६ मिनिटांच्या भाषणात आगामी राजकीय लढाईची दिशा स्पष्ट करण्याचा प्रयत्न दिसून आला. पारंपरिक राजकारणापेक्षा डिजिटल राजकारणाचे महत्त्व वाढले आहे आणि या नव्या राजकीय मैदानात भाजपच्या कार्यकर्त्यांनी अधिक प्रभावीपणे उतरावे, हाच त्यांच्या संवादाचा प्रमुख सूर राहिला.