India-US Relations: पश्चिम आशियातील इराण आणि अमेरिकेतील संघर्ष लवकरच संपुष्टात येण्याची आशा असताना भारतासाठी सातासमुद्रापारहून आणखी एक खुशखबर आली आहे. भारत आणि अमेरिका अंतरिम व्यापार करार पूर्ण करण्याच्या जवळ पोहोचले असून जूनमध्ये अंतिम वाटाघाटी होण्याची शक्यता आहे.
भारतातील अमेरिकेचे राजदूत सर्जिओ गोर यांनी एकीकडे भारताची प्रशंसा केलीआणि येत्या काही आठवड्यांत आणि महिन्यांत भारतासोबत अंतरिम Trade Deal अंतिम होईल, अशी अमेरिकेला आशा आहे, असे म्हटले. सर्जिओ गोर यांच्या या स्पष्ट संदेशामुळे चीन आणि पाकिस्तानमध्ये नक्कीच खळबळ उडाली असेल, कारण अमेरिका-भारताने करार करणे त्यांना सहज पचणार नाही. तंत्रज्ञानाच्या क्षेत्रासह नव्या संधीच्या शोधात असणाऱ्या भारतासाठी अमेरिकेसोबत भागीदारीपेक्षा अधिक सुस्थितीत दुसरी कोणतीही भागीदारी नसेल.
भारत-अमेरिका ट्रेड डीलवर नवीन अपडेट
IIT दिल्ली येथे बोलताना गोर यांनी दोन्ही देशांमधील आर्थिक संबंधांच्या लक्षणीय विस्तारावर प्रकाश टाकला. सर्जिओ गोर दिल्लीत म्हणाले, "आमच्यासमोर एक अंतरिम व्यापार करार आहे, ज्याला आम्ही अंतिम रूप देणार आहोत. यामुळे दोन्ही देशांसाठी समृद्धीचे नवीन मार्ग खुले होतील."तसेच "येत्या काही आठवड्यांत आणि महिन्यांत या व्यापार करारावर स्वाक्षरी होईल अशी आम्हाला आशा आहे," असेही अमेरिकेचे राजदूत पुढे म्हणाले. याशिवाय अमेरिका भारताच्या आर्थिक आणि तांत्रिक सामर्थ्याला अधिकाधिक मान्यता देत असून भारतासोबत आपले संबंध अधिक दृढ करण्यास उत्सुक असल्याचेही त्यांनी आपल्या विधानात पुढे म्हटले.
गोर म्हणाले, "अमेरिका-भारत संबंधांना अधिक सुलभ आर्थिक संबंधांमध्ये रूपांतरित करण्याची एक प्रचंड संधी आहे." तसेच विशेषतः तंत्रज्ञानाच्या क्षेत्रात, उदयास येणाऱ्या संधींचा फायदा घेण्यासाठी भारत-अमेरिका भागीदारीपेक्षा दुसरी कोणतीही भागीदारी अधिक सुस्थितीत नाही, असेही त्यांनी म्हटले. भारत-अमेरिका यांच्या प्रस्तावित व्यापार करारातील केवळ '1 टक्के' भाग अंतिम होणे बाकी असून पुढील वाटाघाटींसाठी अमेरिकन शिष्टमंडळ नवी दिल्लीच्या दौऱ्यावर येत आहे आणि त्यानंतरच्या काही आठवड्यांत या करारावर स्वाक्षऱ्या होतील, अशी अपेक्षा असल्याचे अमेरिकेचे राजदूत सर्जिओ गोर यांनी शुक्रवारी सांगितले.
भारत-अमेरिका व्यापार करारामुळे काय फायदा होणार?
दोन्ही देशांमधील प्रस्तावित अंतरिम व्यापार करारामुळे दोंघाच्या व्यवसायांना एकमेकांच्या बाजारात पूर्वीपेक्षा आणखी सहज एन्ट्री मिळू शकेल आणि नवीन संधी निर्माण होतील. भारत आणि अमेरिकेतील अधिकारी सध्या टॅरिफ (आयात शुल्क), A-शुल्क अडथळे, व्यापार सुलभतेचे उपाय आणि आर्थिक सुरक्षा सहकार्य यांसारख्या व्यापक व्यापारविषयक मुद्द्यांवरही काम करत आहेत.या व्यापार करार चर्चांशी परिचित सूत्रांच्या माहितीनुसार अमेरिका एका यशस्वी व्यापारी कराराला अंतिम रूप देण्यास उत्सुक आहे जेणेकरून या वर्षाच्या अखेरीस होणाऱ्या मध्यावधी निवडणुकांपूर्वी ट्रम्प प्रशासन मोठी आर्थिक कामगिरी जगासमोर मांडण्यासाठी प्रयत्नशील आहे.