म.टा. प्रतिनिधी, नाशिक: नाशिक-पुणे हायस्पीड रेल्वेमार्ग बारगळल्यानंतर आता जपानच्या पुढाकाराने बुलेट ट्रेनला चालना मिळणार आहे. जपानच्या सरकारच्या सहकार्याने सुरू असलेल्या अहमदाबाद-मुंबई-पुणे-हैदराबाद हायस्पीड रेल्वे (बुलेट ट्रेन) प्रकल्पाशी आता नाशिकही कनेक्ट होणार आहे.
या प्रकल्पाच्या मुख्य मार्गाला नाशिक फिडर कनेक्टिव्हिटीद्वारे जोडण्यात येणार असून, या हायस्पीड कॉरिडोरमुळे 'ठाणे-पुणे-नाशिक' असा नवा आर्थिक सुवर्णत्रिकोण आकारास येणार आहे. या प्रकल्पामुळे नाशिककरांना मुंबई, पुणे आणि हैदराबाद ही शहरे अवघ्या दीड-दोन तासांत गाठणे शक्य होणार आहे.
जपान इंटरनॅशनल को-ऑपरेशन एजन्सी (जेआयसीए) आणि 'असोसिएशन ऑफ फ्रेंड्स ऑफ जपान' (एएफजे) यांच्या पुढाकाराने नाशिकला 'हायस्पीड रेल्वे' नेटवर्कशी जोडण्याच्या प्रस्तावावर शुक्रवारी (दि. २९) महापालिका आयुक्तांसोबत उच्चस्तरीय जपानी सल्लागार टीमची महत्त्वाची बैठक झाली. प्रभारी आयुक्त अमित रंजन यांच्यासोबत जपानी शिष्टमंडळाने केलेल्या चर्चेत नाशिकला अहमदाबाद-मुंबई-हैद्राबाद या बुलेट ट्रेन प्रकल्पाशी जोडणाऱ्या प्रस्तावाचे सादरीकरण केले. या प्रकल्पामुळे नाशिकचे केवळ दळणवळणच नाही, तर संपूर्ण अर्थचक्र बदलून जाणार असून अहमदाबाद- मुंबई- पुणे- हैदराबाद हायस्पीड रेल्वे (बुलेट ट्रेन) विस्तारीकरण प्रकल्पाचा थेट फायदा आता नाशिकला मिळणार आहे. या प्रकल्पाच्या मुख्य मार्गाला नाशिक फिडर कनेक्टिव्हिटीद्वारे जोडण्यात येणार असून, यामुळे नाशिककरांना मुंबई, पुणे आणि हैदराबाद ही शहरे अवघ्या दीड ते दोन तासाच्या संपर्कात येणार आहेत.
वाइन, कृषी उद्योगाला मिळणार चालना
अहमदाबाद- मुंबई- हैदराबाद या विस्तारित बुलेट ट्रेनला नाशिक फिडर कनेक्टिव्हिटीद्वारे जोडण्यात येणार आहे. त्यामुळे हायस्पीड कॉरिडोरमुळे ' ठाणे- पुणे- नाशिक' असा नवा त्रिकोणीय प्रादेशिक विकास आकारास येत आहे. या सुवर्णत्रिकोणामुळे नाशिक महापालिकेच्या हद्दीत आणि संपूर्ण जिल्ह्यात आर्थिक क्रांती होण्याची शक्यता आहे. नाशिकच्या पायाभूत सुविधा आणि औद्योगिक विकासाला नवी झळाळी मिळण्याची शक्यता निर्माण झाली आहे.