Chandranath Rath: मुख्यमंत्रिपदाच्या शर्यतीत अधिकारी, पीए चंद्रनाथ रथ यांच्यावर बेछुट गोळीबार, जागेवर अंत; बंगालमध्ये खळबळ

कोलकाता: पश्चिम बंगालमधील विधानसभा निवडणुकीचे निकाल लागल्यानंतर राजकीय वातावरण शांत होईल असं वाटत असतानाच, ते अधिकचं पेटत चाललंं आहे. बंगालमध्ये आता पुन्हा एकदा हिंसाचाराने डोकं वर काढलं आहे.

भाजपच्या विजयाचे मुख्य शिल्पकार मानले जाणारे सुवेंदू अधिकारी यांच्या निकटवर्तीय सहकाऱ्याला निर्घृणपणे संपवण्यात आल्याची धक्कादायक घटना समोर आली आहे. अधिकारी यांचे खासगी सचिव चंद्रनाथ रथ यांच्यावर भरदिवसा गोळ्या झाडून हल्ला करण्यात आला असून या घटनेमुळे संपूर्ण बंगालमध्ये खळबळ उडाली आहे.

नेमकं काय घडलं?

प्राप्त माहितीनुसार, उत्तर २४ परगणा जिल्ह्यातील मध्यमग्राममधील दोहारिया परिसरात ही घटना घडली आहे. चंद्रनाथ रथ हे आपल्या स्कॉर्पिओ गाडीतून सहकाऱ्यांसह जात होते. यावेळी दुचाकीवरून आलेल्या तीन अज्ञात हल्लेखोरांनी त्यांची गाडी अडवली आणि काही कळण्याच्या आतच त्यांच्यावर बेछुट गोळीबार केला.

डोक्यात आणि छातीत झाडल्या गोळ्या

हल्लेखोर इतक्या तयारीत होते की त्यांनी रथ यांच्यावर अत्यंत जवळून ४ गोळ्या झाडल्या. यातील एक गोळी थेट त्यांच्या डोक्यात घुसली, तर इतर गोळ्या छाती आणि पोटात लागल्या. गोळीबार इतका भीषण होता की चंद्रनाथ रथ यांचा जागीच मृत्यू झाला. कृत्य केल्यानंतर हल्लेखोर दुचाकीवरून पसार झाले असून पोलीस सध्या त्यांचा शोध घेत आहेत.

सुवेंदू अधिकारींचे 'विश्वासू'

चंद्रनाथ रथ हे केवळ अधिकारी यांचे पीए नव्हते, तर ते त्यांचे अत्यंत विश्वासू मानले जात होते. निवडणूक काळात सुवेंदू अधिकारी यांच्या प्रचाराची आणि नियोजनाची मोठी जबाबदारी रथ यांच्या खांद्यावर होती. पश्चिम बंगालमध्ये भाजपने ऐतिहासिक यश मिळवल्यानंतर सुवेंदू अधिकारी यांचे नाव मुख्यमंत्रिपदाच्या शर्यतीत सर्वात आघाडीवर आहे. अशातच त्यांच्या खासगी सचिवाला संपवल्याने राजकीय वर्तुळात आता चर्चा आता रंगू लागली आहे.

बंगालमध्ये दहशतीचे वातावरण

निवडणुकीनंतर सुरू झालेल्या या हिंसाचारामुळे सामान्य जनतेत भीतीचे वातावरण आहे. एकीकडे भाजप सत्तास्थापनेची आणि शपथविधीची तयारी करत असतानाच, दुसरीकडे सुवेंदू अधिकारी यांच्या गोटात या घटनेमुळे शोककळा पसरली आहे. पोलिसांनी घटनास्थळी धाव घेत तपास सुरू केला असून, या प्रकरणाचे पडसाद आगामी काळात उमटण्याची शक्यता आहे.