थिएटरमध्ये रिलीज झालेले सिनेमे आता ठराविक कालावधीनंतर वेगवेगळ्या ओटीटी प्लॅटफॉर्मवर रिलीज होतात. काही दिवसांपूर्वी सुपर डुपर हा सिनेमा थिएटरमध्ये रिलीज झालेला. तो आता ओटीटी प्लॅटफॉर्म द्वारे प्रेक्षकांना घरच्या घरी पाहता येणार आहे.

99 प्रॉडक्शन्स आणि सिद्धिविनायक प्रॉडक्शन्स यांनी झी स्टुडिओजच्या सहकार्याने 'सुपर डुपर'या या चित्रपटाची निर्मिती केली आहे. या चित्रपटात ललित प्रभाकर, विदुला चौगुले, निर्मिती सावंत, हृषीकेश जोशी, शशांक शेंडे, कुशल बद्रिके आणि नम्रता संभेराव यांच्या महत्त्वाच्या भूमिका आहेत. कौटुंबिक कथा आणि खळखळून हसत खेळत घराच्या सोबत हा चित्रपट बघावा अशी याची कथा आहे.



दिग्दर्शक समीर आशा पाटील यांच्या 'सुपर डुपर'या कॉमेडी-ड्रामा शैलीतील चित्रपटाच्या डिजिटल प्रीमियरची घोषणा मराठी ZEE5 ने केली आहे. चित्रपटगृहांमध्ये यशस्वी प्रदर्शन आणि प्रेक्षकांचा उत्तम प्रतिसाद मिळाल्यानंतर हा चित्रपट आता 29 मे 2026 रोजी मराठी ZEE5वर डिजिटल माध्यमातून प्रदर्शित होणार आहे.

रोहित आणि त्याची प्रेयसी ईशा मुंबई सारख्या शहरा स्वतःची स्वप्ने पूर्ण करण्यासाठी धडपडणाऱ्या दोन तरुण व्यावसायिकांभोवती 'सुपर डुपर' ही कथा फिरते. एका दलालामार्फत ते एक फ्लॅट खरेदी करतात. मात्र, त्यानंतर त्यांना धक्का बसतो, कारण तोच फ्लॅट नुकतेच गावाहून मुंबईत आलेल्या जाधव कुटुंबालाही विकण्यात आलेला असतो. कायदेशीर वाद सुटेपर्यंत दोन्ही कुटुंबांनी एकाच घरात राहावे, असा आदेश न्यायालयाकडून देण्यात येतो आणि त्यानंतर गोंधळ, विनोद आणि भावनिक प्रसंगांनी भरलेला प्रवास सुरू होतो. परस्परविरोधी जीवनशैलीमुळे निर्माण होणारे संघर्ष, पिढ्यांमधील मतभेद, भावनिक नाती आणि शहरातील दैनंदिन संघर्ष यांची रंगतदार मांडणी या कथेमध्ये पाहायला मिळते.

'सुपर डुपर' या सिनेमाचं वैशिष्ट्ये म्हणजे विनोद आणि कौटुंबिक नाट्य यांचा भावनिक स्पर्श या सिनेमात उत्तम दाखवण्यात आला आहे. शहरी स्वप्ने आणि पारंपरिक मूल्यांमधील संघर्षाचे वास्तवदर्शी चित्रण यातून बघायला मिळत. उत्कृष्ट विनोदी टायमिंगसाठी ओळखल्या जाणाऱ्या अनुभवी कलाकारांची कास्ट या सिनेमाला लाभली आहे. दैनंदिन आयुष्यातील प्रसंगांना विनोदाची जोड देणारी सहजसुंदर कथा या सिनेमातून पाहायला मिळेल.

झी मराठीच्या चीफ चॅनल ऑफिसर आणि मराठी ZEE5 च्या बिझनेस हेड हेमा व्ही. आर. म्हणाल्या, "यंदा ZEE5 वर विविध प्रकारचे उत्कृष्ट मराठी चित्रपट रिलीज करण्यात येणार आहेत. 'क्रांतिज्योती विद्यालय मराठी माध्यम', 'अगं अगं सूनबाई! काय म्हणताय सासूबाई?' आणि 'तिघी' यांसारख्या गाजलेल्या चित्रपटांच्या यशानंतर आता 'सुपर डुपर'सारखा खुसखुशित कौटुंबिक चित्रपट प्रेक्षकांसमोर आणताना आम्हाला आनंद होत आहे. दैनंदिन आयुष्यातील वास्तवाशी जोडलेली ही कथा आधुनिक शहरी जीवनशैली आणि खोलवर रुजलेल्या पारंपरिक मूल्यांमधील संघर्ष हलक्याफुलक्या शैलीत मांडते.

दिग्दर्शक समीर आशा पाटील म्हणाले, "'सुपर डुपर' ही मूळात मतभेद असूनही एकत्र राहायला शिकणाऱ्या माणसांची कथा आहे. चित्रपटाची संकल्पना विनोदी आणि गोंधळाने भरलेली असली तरी त्यामधील भावना अत्यंत जवळच्या वाटतात, कारण प्रत्येक कुटुंबाच्या स्वतःच्या सवयी, श्रद्धा आणि असुरक्षितता असतात आणि त्यातूनच विनोदनिर्मिती होते. अनपेक्षित परिस्थितीमुळे माणसे कशा प्रकारे एकमेकांच्या जवळ येऊ शकतात, हे या चित्रपटात विनोदाच्या माध्यमातून दाखवण्यात आले आहे. मराठी ZEE5 च्या माध्यमातून ही कथा आता विविध भागांतील प्रेक्षकांपर्यंत पोहोचणार असून प्रत्येक कुटुंबाशी नाते जोडेल, याचा मला आनंद आहे."

अभिनेत्री निर्मिती सावंत म्हणाल्या, "'सुपर डुपर'ची खासियत म्हणजे या चित्रपटातील प्रत्येक व्यक्तिरेखा खरी आणि आपल्याच आसपासची वाटते. विशेषतः, पूर्णपणे वेगवेगळ्या जगातील लोकांना एकाच घरात राहावे लागते, तेव्हा भारतीय कुटुंबांमध्ये निर्माण होणारा गोंधळ, प्रेम आणि धमाल या चित्रपटात पाहायला मिळते. मराठी ZEE5ने नेहमीच मातीतल्या कथा प्रेक्षकांपर्यंत पोहोचवल्या आहेत. त्यामुळे हा चित्रपटही या प्लॅटफॉर्मवरून अधिक व्यापक प्रेक्षकांपर्यंत पोहोचणार असल्याचा मला आनंद आहे."