Karul Ghat Accident : सिमेंटने भरलेला भरधाव ट्रक दरीत कोसळला, भीषण अपघाताने कुटुंबावर दु:खाचा डोंगर; बाप-लेकाचा करुण अंत

सिंधुदुर्ग : सिंधुदुर्ग जिल्ह्यातील कारूळ घाटात भीषण अपघात झाला असून या अपघातात बाप-लेकाचा जागीच मृत्यू झाल्याची दुर्दैवी व हृदयद्रावक घटना घडली आहे. या घाटात सिमेंटने भरलेला एक ट्रक कोसळल्याने हा भीषण अपघात झाला आहे.

बाप-लेकांचा जागीच मृत्यू

सिमेंटने भरलेला ट्रक करूळ घाटात कोसळून भीषण अपघात झाला. या अपघातात विजापूर येथील बाप-लेकांचा जागीच मृत्यू झाला आहे. ट्रक सुमारे 500 फूट खोल दरीत कोसळल्यानं मृतदेह बाहेर काढण्यासाठी मोठी कसरत करावी लागली. घटनेची माहिती मिळताच पोलिसांनी तात्काळ घटनास्थळी धाव घेतली. करुळ येथील सह्याद्री जीवरक्षक टीमच्या मदतीने बचावकार्य राबविण्यात आले. अत्यंत कठीण परिस्थितीत मोठ्या प्रयत्नांनंतर दोन्ही मृतदेह दरीतून बाहेर काढण्यात यश आलं.

परिसरा हळहळ

यावेळी पोलीस निरीक्षक मनोज सोनवलकर, पोलीस कर्मचारी तसेच सह्याद्री जीव रक्षक टीमचे अध्यक्ष हेमंत पाटील, प्रदीप मोरे, राजेंद्र वारंग, रविंद्र सावंत, विजय सावंत, विजय पवार, रत्नकांत राशिवटे, रविंद्र चव्हाण, आनंद शिंदे, अमर शिंदे, रघुनाथ चव्हाण, गौरव मोरे, सागर पडवळ, सत्यविजय मोरे, वसंत पाटील आदी उपस्थित होते. तसेच भैरीभवानीचे मालक गिरीधर रावराणे व ग्रामस्थांनीही बचावकार्याला सहकार्य केलं. या भीषण अपघातामुळे परिसरात हळहळ व्यक्त केली जात आहे.

सगळ्यांच्या लाडक्या लाडोबाने स्वत:ला संपवलं

काही दिवसांपूर्वी सिंधुदुर्गमधील जिल्ह्यातील देवगडमध्ये देखील अशीच काहीशी घटना समोर आली होती. देवगड एसटी आगारात वाहक म्हणून सेवेत असलेल्या ३५ वर्षीय युवकाने आत्महत्या केल्याने खळबळ उडाली आहे. लाडोबा उर्फ नाना मेघश्याम लाड (वय ३५) असं आत्महत्या केलेल्या वाहक युवकाचं नाव आहे. लाडोबा हा देवगड एसटी आगारात वाहक म्हणून गेली १५ वर्षे नोकरीस होता. अत्यंत प्रामाणिक व कर्तव्यनिष्ठ वाहक म्हणून त्याची ओळख होती.

कोळंब खडवणनाका येथील लाडोबा मेघश्याम लाड याचं पार्थिव नांदरूख सतीची खाण परिसरातील जंगलमय भागात गळफास घेतलेल्या स्थितीत आढळून आला आहे. ही घटना शुक्रवारी रात्री उघडकीस आली. या प्रकरणी पोलिसांनी तात्काळ घटनास्थळी दाखल होत तपास सुरू केला आहे. त्याच्या आकस्मिक निधनामुळे त्याच्या कुटुंबियांना आणि मित्रपरिवाराला धक्का बसला आहे.