सर्वप्रथम ताजा नारळ घ्या. नारळ फोडल्यानंतर त्यातील पाणी पूर्णपणे काढून घ्या. त्यानंतर नारळाचे दोन भाग करा आणि त्यातील पांढरा गर वेगळा काढा.नारळाच्या गरावर तपकिरी साल लागलेली असेल तर ती सुरीच्या मदतीने शक्य तितकी काढून घ्या. यामुळे किसाचा रंग अधिक पांढराशुभ्र राहतो आणि तयार झालेला नारळ दिसायलाही छान दिसतो. आता नारळाचे गर छोटे-छोटे तुकडे करून घ्या. खूप मोठे तुकडे ठेवू नका. साधारण एक ते दोन इंचाचे तुकडे केले तर पुढची प्रक्रिया सोपी होते.

आता एका भांड्यात थोडे पाणी घ्या आणि ते गरम करा. पाणी उकळून घेण्याची गरज नाही; ते चांगले गरम झाले तरी पुरेसे आहे.नारळाचे तुकडे या गरम पाण्यात साधारण १० ते १५ मिनिटे ठेवून द्या. या प्रक्रियेमुळे नारळाचा गर थोडा मऊ होतो आणि पुढे तो सहज बारीक करता येतो.यानंतर नारळाचे तुकडे पाण्यातून बाहेर काढा आणि त्यातील अतिरिक्त पाणी पूर्णपणे निथळू द्या.येथे एक गोष्ट लक्षात ठेवणे महत्त्वाचे आहे नारळाचे तुकडे खूप ओले राहिले तर पुढे मिक्सरमध्ये फिरवल्यावर किसाऐवजी चिकट मिश्रण तयार होऊ शकते. त्यामुळे पाणी चांगले निथळणे गरजेचे आहे.

आता सर्वात महत्त्वाचा टप्पा येतो.नारळाचे तुकडे मिक्सरच्या भांड्यात घाला. येथे पाणी घालू नका. मिक्सर सतत चालू ठेवण्याऐवजी काही सेकंदांसाठीच चालू करा आणि लगेच बंद करा.म्हणजेच मिक्सरला पल्स मोडमध्ये वापरायचे आहे.
एक-दोन सेकंद मिक्सर चालू करा, बंद करा आणि पुन्हा एक-दोन सेकंद चालू करा. असे करताना मध्येच झाकण उघडून नारळाची स्थिती तपासा.सुरुवातीला नारळाचे मोठे तुकडे बारीक होत जातील. काही वेळाने त्याचा सुंदर, बारीक आणि सैल किस तयार होईल.

इथे एक महत्त्वाची काळजी घ्या. मिक्सर सलग जास्त वेळ चालवू नका. तसे केल्यास नारळातील नैसर्गिक तेल बाहेर पडू शकते आणि किसाचा पोत बदलून तो पेस्टसारखा होऊ शकतो. आपल्याला किस हवा आहे, नारळाची पेस्ट नाही.

गणेश चतुर्थीसाठी किंवा नारळी पैर्णिमेला नैवेद्य बनवताना नारळाचा किस पांढरा आणि ताजा दिसला तर पदार्थ आणखी सुंदर दिसतो.यासाठी नारळाचा पांढरा गर नीट स्वच्छ करून घेणे महत्त्वाचे आहे. तपकिरी साल शक्य तितकी काढून टाका. तसेच नारळाचा किस तयार झाल्यानंतर तो बराच वेळ उघडा ठेवू नका.किस तयार झाल्यावर तो पूर्णपणे थंड होऊ द्या. त्यानंतरच साठवण्यासाठी पुढची प्रक्रिया करा.