जालना : मराठा नेते मनोज जरांगे पाटील हे उद्यापासून उपोषणाला बसण्यावर ठाम आहेत. मराठा समाजाला कुणबी जात प्रमाणपत्र मिळावेत. तसेच सरकारच्या तपासात सापडलेल्या 54 लाख कुणबी नोंदींना मान्यता देवून तातडीने जात प्रमाणपत्र द्यावे.
तसेच जात प्रमाणपत्र दिल्यानंतर त्याच्या आधारावर जात वैधता प्रमाणपत्र देखील द्यावे, अशी मागणी मनोज जरांगे यांनी केली आहे. मराठा आरक्षण मंत्रिमंडळ उपसमितीचे अध्यक्ष राधाकृष्ण विखे पाटील आणि आमदार प्रसाद लाड यांनी आज अंतरवली सराटीत जावून मनोज जरांगे यांची भेट घेतली. यावेळी त्यांनी जवळपास दोन तास मनोज जरांगे यांची मनधरणी करण्याचे प्रयत्न केले. पण यामध्ये त्यांना यश आलं नाही. मनोज जरांगे यांनी उद्या भर उन्हात उपोषणाला बसणार असल्याचं म्हटलं आहे. तसेच पाणीदेखील घेणार नाही, अशी भूमिका त्यांनी घेतली आहे.
मनोज जरांगे नेमकं काय म्हणाले?
'हैदराबाद गॅझेटनूसार ६१ हजार जात प्रमाणपत्राचे वाटप'
विखे पाटील म्हणाले, "न्या. शिंदे समिती स्थापन झाल्यापासून कुणबी प्रमाणपत्र देण्याची कार्यवाही वेगाने सुरू आहे. मागील तीन वर्षात मराठवाड्यात ३ लाख २ हजार कुणबी प्रमाणपत्र देण्यात आली. त्यात मागील सहा महिन्यांचा म्हणजे हैदराबाद गॅझेट लागू झाल्यानंतरची आकडेवारी पाहिली तर ६१ हजार प्रमाणपत्र दिली गेली आहेत. याबाबत बैठकीत सविस्तर आढावा घेतला."
"काही ठिकाणी जात प्रमाणपत्र देण्यात अधिकारी दिरंगाई करत असल्याच्या तक्रारी आहेत. त्याबाबत योग्य कार्यवाही करण्याचे निर्देश विभागीय आयुक्तांना दिले आहेत. प्रमाणपत्र वाटपासाठी आपण त्रिस्तरीय समिती नियुक्त केली आहे. या समित्या अधिक सक्रिय करण्याचे तसेच या समितीच्या माध्यमातून लोकांमध्ये जनजागृती करुन प्रमाणपत्र देण्याचे निर्देश दिले आहेत. गावोगावी दवंड्या देणे, ग्रामसभांमधून आवाहन करणे आदी पद्धतीने हे काम केले जाईल. आगामी काळात याबाबत एक विशेष मोहिम राबविली जाणार आहे", असेही विखे यांनी सांगितले.
दरम्यान, मराठवाड्यातील आठ जिल्ह्यांत ४९ हजार ७८ एवढ्या कुणबी नोंदी सापडल्या होत्या. तर कुणबी प्रमाणपत्र मिळावे म्हणून अर्ज करण्यात आलेल्या तीन लाख ८९८ अर्ज पैकी केवळ ४२७ अर्ज नाकारण्यात आलेले आहेत. ३ लाख २५१ कुणबी प्रमाणपत्र देण्यात आले आहेत तर फक्त २२० अर्जावर निर्णय घेणे बाकी असल्याचा दावा प्रशासनाने या बैठकीत केला आहे.
एसडीएमवर कारवाईचे निर्देश