मुंबई : महाराष्ट्राच्या राजकारणातील मोठी बातमी समोर येत आहे. विधान परिषदेच्या निवडणुकीसाठी भाजपकडून उमेदवारांची घोषणा करण्यात आली आहे. भाजपकडून एकूण 11 उमेदवारांची घोषणा करण्यात आली आहे.
विशेष म्हणजे उमेदवारी अर्ज दाखल करण्यासाठी अवघे काही तास शिल्लक असताना भाजपकडून उमेदवारांची घोषणा करण्यात आली आहे. विधान परिषदेच्या निवडणुकीसाठी भाजप उमेदवारांचे नाव निश्चित करण्यासाठी महाराष्ट्राचे मुख्यमंत्री देवेंद्र फडणवीस हे आज दिल्लीत गेले होते. दिल्लीत भाजपच्या केंद्रीय निवडणूक समितीची बैठक पार पडली. जवळपास दोन तास ही बैठक चालली. ही बैठक संपवून देवेंद्र फडणवीस बाहेर पडल्यानंतर काही वेळाने भाजपकडून अधिकृतपणे उमेदवारांची घोषणा करण्यात आली.
विधान परिषदेच्या या निवडणुकीत महायुतीच्या घटकपक्षांमध्ये अनेक जागांवरुन चुरस होती. पण अखेर 16 पैकी तब्बल 11 जागांचे उमेदवार जाहीर करुन भाजप हाच महायुतीत मोठा भाऊ असल्याचं भाजपने सिद्ध केलं आहे. भाजपकडे संख्याबळ जास्त असल्याने भाजपने या सर्व जागांवर आग्रह केला होता. विशेष म्हणजे छत्रपती संभाजीनगर-जालना या जागेबाबात मोठा सस्पेन्स होता. या जागेवर नेमंक कोण लढणार? हे अजूनपर्यंत समजू शकलेलं नव्हतं. पण आता ही जागा नेमकी कोणत्या पक्षाला सुटली आणि उमेदवारी कोण लढवणार? याचंदेखील उत्तर मिळालं आहे.
भाजपकडून वर्धा-चंद्रपूर-गडचिरोली विधान परिषदेच्या जागेसाठी अरुण लखानी यांना उमेदवारी जाहीर झाली आहे. तर अमरावतीच्या जागेसाठी प्रवीण पोटे यांना उमेदवारी जाहीर झाली आहे. प्रवीण पोटे यांनी याआधीच उमेदवारी अर्ज भरला आहे. त्यांची अधिकृत उमेदवारी जाहीर झाली नव्हती. पण त्यांची अधिकृत उमेदवारी आज जाहीर झाली आहे.
भंडारा-गोंदिया विधान परिषदेच्या जागेसाठी अविनाश ब्राम्हणकर यांना उमेदवारी जाहीर झाली आहे. अविनाश यांनी विधानसभा निवडणुकीत काँग्रेसचे नाना पटोले यांना अत्यंत चुरशीची लढत दिली होती. अवघ्या अडीचशे मतांनी त्यांचा पराभव झाला होता. पक्षाने आता त्यांना विधान परिषदेची संधी दिली आहे.
सोलापूर विधान परिषदेच्या जागेसाठी भाजपकडून राजेंद्र राऊत यांना उमेदवारी जाहीर झाली आहे. सांगली-सातारा जागेतून धैर्यशील कदम यांना उमेदवारी जाहीर झाली आहे. विशेष म्हणजे अहिल्यानगरमधून राष्ट्रवादी काँग्रेस शरदचंद्र पवार पक्षातून भाजपात नुकतेच प्रवेश करणारे प्राजक्त तनपुरे यांना उमेदवारी झाली आहे.
छत्रपती संभाजीनगरच्या सस्पेन्सवर पडदा
जळगावच्या जागेबाबतही मोठा सस्पेन्स होता. स्थानिक शिवसेनेचे आमदार जळगावच्या जागेसाठी प्रचंड आग्रही होते. यासाठी जळगाव जिल्ह्यातील शिवसेनेच्या आमदारांची गुप्त बैठक देखील पार पडली होती. या बैठकीत मैत्रीपूर्ण लढत लढण्याचा निर्णय झाला होता. पण त्यानंतर याबाबत कोणत्याही चर्चा समोर आल्या नव्हता. अखेर भाजपकडून जळगावच्या जागेसाठी नंदकिशोर महाजन यांना उमेदवारी जाहीर झाली आहे. नांदेडमधून अमर राजूरकर यांना उमेदवारी जाहीर झाली आहे. धाराशिव-लातूरमधून बसवराज पाटील यांना उमेदवारी जाहीर झाली आहे. तर नागपूरच्या पोटनिवडणुकीसाठी राजीव पोतदार यांना उमेदवारी जाहीर झाली आहे. उद्या उमेदवारी अर्ज दाखल करण्यासाठी शेवटचा दिवस अजून, अर्ज दाखल करण्याची वेळ ही दुपारी तीन वाजेपर्यंत असणार आहे.