मुंबई : मुंबईमध्ये लोकलचे काही ना काही कामे सुरु असतात. आता सध्या लोकलमधून प्रवास करणाऱ्यांसाठी ताजी अपडेट आली आहे.मध्य रेल्वेकडून कसारा-इगतपुरी सेक्शनमध्ये ओव्हरहेड इक्विपमेंट (OHE) संदर्भातील अडथळे दूर करण्यासाठी विशेष ट्रॅफिक आणि पॉवर ब्लॉक घेण्यात येणार आहे.
२ जून ते ५ जून २०२६ या कालावधीत दररोज दुपारी ३.५० ते ५.५० या वेळेत हा ब्लॉक घेण्यात येणार असल्याची माहिती मध्य रेल्वेकडून प्रसिद्धीपत्रकाद्वारे देण्यात आली आहे. हा ब्लॉक कसारा-खर्डी दरम्यान अप लाईन, मिड लाईन, अप यार्ड लाईन आणि थळ घाट रिव्हर्सल केबिन परिसरात घेण्यात येणार आहे. या कालावधीत आसनगाव ते कसारा दरम्यान लोकल सेवा बंद राहणार आहे. प्रवाशांना गैरसोयीचा सामना करावा लागण्याची शक्यता आहे. त्यामुळे प्रवाशांना मोठ्या गैरसोयीचा सामना करावा लागण्याची शक्यता आहे.
काही लोकल आसनगावपर्यंतच धावणार
तर कसाराहून सुटणाऱ्या काही लोकल आता आसनगावहून पुढे सीएसएमटीसाठी रवाना होतील. N24 लोकल आसनगावहून ४.१२ वाजता, N26 लोकल ४.५४ वाजता आणि N28 लोकल ५.३९ वाजता सुटणार आहे.
ब्लॉकपूर्वी आणि नंतरच्या महत्त्वाच्या लोकल
ब्लॉकपूर्वी कसारासाठीची शेवटची लोकल N17 असेल. ही लोकल सीएसएमटीवरून दुपारी १२.३० वाजता सुटेल. तर ब्लॉकपूर्वी सीएसएमटीसाठीची शेवटची लोकल N22 असून ती कसाराहून दुपारी २.४२ वाजता रवाना होईल.
ब्लॉकनंतर कसारासाठीची पहिली लोकल N25 असून ती सायंकाळी ४.५० वाजता सीएसएमटीवरून सुटेल. तर ब्लॉकनंतर सीएसएमटीसाठीची पहिली लोकल N30 ही कसाराहून सायंकाळी ६.१७ वाजता रवाना होणार आहे.
रेल्वे प्रशासनाचे आवाहन
मध्य रेल्वेकडून पायाभूत सुविधांची देखभाल आणि सुरक्षिततेसाठी हे ब्लॉक आवश्यक असल्याचे सांगण्यात आले आहे. प्रवाशांनी वेळापत्रक तपासूनच प्रवासाचे नियोजन करावे, असे आवाहन रेल्वे प्रशासनाने केले आहे.