कॅब बुक करण्यात आल्यानं चालकांनी लोकेशन गाठलं. तिथे जाऊन प्रवाशाला फोन केला. पण प्रतिसाद मिळाला नाही. असा प्रकार थोड्या थोडक्या नव्हे तर तब्बल २५० कॅब चालकांसोबत घडला. त्यानंतर जिथून बुकिंग झालंय, त्या फ्लॅटबद्दल धक्कादायक माहिती समोर आली.

आरामदायी प्रवासासाठी कॅब बुकिंग आता अगदी सर्वसामान्य बाब झाली आहे. यामुळे खर्च वाढला असला तरीही प्रवास सुखकर झाला आहे. पण दोन दिवसांपूर्वी याच कॅब बुकिंगच्या बाबतीत चक्रावून टाकणारा प्रकार घडला.

राजस्थानची राजधानी जयपूरमधील वाटिका रोडवरील गुलमोहर गार्डनमधील एका फ्लॅटमधून कॅब बुकिंगचा सिलसिला सुरु झाला. फ्लॅट नंबर डब्ल्यू-१६६ मधून दुपारी तीन ते संध्याकाळी सातच्या दरम्यान एक, दोन नव्हे, तर तब्बल २५० कॅब बुक झाल्या.

बुकिंग स्वीकारणारे चालक गुलमोहर गार्डन इमारतीच्या जवळ पोहोचले. पण तिथे त्यांना प्रवासी सापडला नाही. उबर ऍपवर दाखवण्यात आलेल्या लोकेशनच्या आधारे अनेक चालकांनी गुलमोहर गार्डन गाठलं. प्रत्येक वेळी पिकअप लोकेशनमध्ये तोच फ्लॅट दिसत होता. पण ड्रॉप लोकेशन वेगवेगळं होतं.

इमारतीच्या सुरक्षा रक्षकानं दिलेल्या माहितीनुसार, अनेक कॅब्स येत होत्या आणि चालकाशिवाय परत जात होत्या. कॅब ज्या नंबरवरुन बुक झाली, त्या फोनवरुन कॉल केल्यावर समोरुन कोणताच प्रतिसाद मिळत नव्हता.

एकाच ठिकाणावरुन इतक्या मोठ्या प्रमाणात बुकिंग होणं हा विषय साधा नाही. हा प्रकार सायबर गुन्ह्याचा किंवा एखाद्या संघटित फसवणुकीचा असावा, अशी शक्यता तज्ज्ञांनी बोलून दाखवली. फेक अकाऊंट किंवा लोकेशन स्पूफिंगच्या मदतीनं या बुकिंग करण्यात आल्याचा संशय आहे.