मुंबई: बॉलिवूडचे अनेक कलाकार त्यांच्या फिटनेससाठी ओळखले जातात.पण आता वयाच्या ७६ व्या वर्षी जीममध्ये वर्कआऊट करतानाचा अभिनेते नाना पाटेकर यांचा व्हिडिओ पाहून नेटकरीही थक्क झाले आहत.
अभिनेते नाना पाटेकर हे त्यांच्या दमदार अभिनयासाठी आणि स्पष्टवक्तेपणासाठी ओळखले जातात. मात्र, सध्या नाना त्यांच्या अभिनयामुळं नाही, तर त्यांच्या कमालीच्या फिटनेसमुळं सोशल मीडियावर चर्चेच आहेत. वयाची ७६ वर्षे पूर्ण केल्यानंतरही नानांचा उत्साह आणि फिटनेस पाहून तरुणांनाही घाम फुटेल, अशा प्रतिक्रियाही नेटकरी देत आहेत.
नाना पाटेकर यांचा एक व्हिडिओ सोशल मीडियावर तुफान व्हायरल झाला आहे. या व्हिडिओमध्ये नाना चक्क व्यायाम करताना दिसत आहेत. नानांनी कोणत्याही जिमच्या कपड्यांशिवाय, अगदी साध्या सुती कपड्यांमध्ये त्यांनी सलग १५ ट्रायसेप डिप्स (Tricep Dips) मारले आहेत. ७६ व्या वर्षी इतक्या सहजतेनं व्यायाम करताना पाहून चाहत्यांनी त्यांच्यावर कौतुकाचा वर्षाव केला आहे.
हा व्हिडिओ समोर आल्यानंतर नेटकऱ्यांनी नानांच्या शिस्तीचे आणि जिद्दीचं तोंडभरून कौतुक केलं आहे. काही चाहत्यांनी म्हटले आहे की, "नाना म्हणजे ऊर्जेचा जिवंत झरा आहेत," तर काहींनी "वय ही फक्त एक संख्या आहे," अशी प्रतिक्रिया दिली आहे. तर अनेकांनी मजेत'कंट्रोल उदय कंट्रोल' असं कमेंट्समध्ये म्हटलंय. नाना पाटेकर हे त्यांच्या साध्या राहणीमानासाठी ओळखले जातात आणि या व्हिडिओमधून त्यांनी पुन्हा एकदा सिद्ध केलं आहे की, व्यायामासाठी महागड्या कपड्यांची किंवा जिमची गरज नसते, तर फक्त इच्छाशक्ती लागते.
तर नाना पाटेकर नेहमीच शिस्तबद्ध जीवनशैलीसाठी ओळखले जातात. ते निसर्गाच्या सानिध्यात राहणं आणि घरगुती सकस आहार घेण्यावर भर देतात. चित्रपटसृष्टीतील झगमगाटापासून दूर राहूनही त्यांनी स्वतःला ज्या प्रकारे तंदुरुस्त ठेवलं आहे.
नानांच्या कामाबद्दल बोलायचं झालं तर, प्रकाश झा यांच्या 'संकल्प' या वेब सीरिजद्वारे त्यांनी ओटीटी जगात पाऊल ठेवलं आहे. ही सीरिज ११ मार्च २०२६ रोजी Amazon MX Player वर प्रदर्शित झाली असून सध्या ती प्रचंड चर्चेत आहे.या सीरिजमध्ये नानांनी 'मात साब' ही व्यक्तिरेखा साकारली आहे.