नायजेरियात अबिन अल-अजाबिन जजौ म्हणजेच जारियाचं आश्चर्य नावानं प्रसिद्ध असलेल्या महमूद सादिस बुबानं स्वत:चं वय ३० वर्षे असल्याची बतावणी केली. बुटकेपणाचा आजार असल्यानं माझा चेहरा आणि उंची लहान मुलांसारखी दिसते, अशी कहाणी त्यानं ऐकवली. याच कहाणीच्या आधारे तो संसदेची निवडणूक लढवण्याच्या अगदी जवळ पोहोचला. पण अखेरच्या क्षणी या प्रकरणाला नाट्यमय वळण मिळालं.

नायजेरियातील सर्वात मोठा पक्ष असलेल्या ऑल प्रोग्रेसिव्ह काँग्रेसकडून महमूदच्या मुलाखतीचा एक व्हिडीओ सोशल मीडियावर व्हायरल झाला. 'मी आधी गाडी चालवायचं काम करायचो. माझा जन्म २ ऑगस्ट १९९५ रोजी झाला आहे. मी माझ्या इच्छेनं निवडणूक लढवत नाही. जनतेच्या आग्रहास्तव त्यांची सेवा करण्यासाठी निवडणूक लढवत आहे,' असं महमूदनं मुलाखतीत म्हटलं होतं. त्याचे विचार अनेकांना आवडले. तो सोशल मीडियावर अल्पावधीत लोकप्रिय झाला. अनेक जण त्याला सर्वसामान्य जनतेचा आवाज आणि नवा नेता म्हणू लागले.

नायजेरियाच्या कायद्यानुसार, संसदेची निवडणूक लढवण्यासाठी उमेदवारानं वयाची २५ वर्ष पूर्ण केलेली असावीत. महमूदनं आपण ३० वर्षांचे असल्याची बतावणी केली. दुसरीकडे सोशल मीडियावर त्याची लोकप्रियतादेखील वेगानं वाढत गेली. त्यामुळे त्याची उमेदवारी जवळपास निश्चित झाली. पण लोकप्रियतेमुळेच महमूदची गोची झाली. काहींनी त्याची खरी कागदपत्रं सोशल मीडियावर शेअर केली. त्यात त्याचा पासपोर्ट, जन्मदाखला, राष्ट्रीय ओळखपत्र आणि शाळेतील दाखल्याचा समावेश होता.

कागदपत्रांनुसार महमूदचा जन्म २०१० मध्ये झाला होता. त्यामुळे त्याचं वय ३० वर्षे नव्हे, तर केवळ १६ वर्षे असल्याचं उघड झालं. त्यामुळे देशपातळीवर खळबळ उडाली. सर्वात मोठा राजकीय पक्ष कोणतीही पडताळणी न करता निवडणुकीचं तिकीट कसं काय देत होता, असा प्रश्न निर्माण झाला.

महमूदच्या शाळेतील एक जुना शिक्षक समोर आल्यानं त्याचं पितळ उघडं पडलं. 'काही वर्षांपूर्वीच महमूदला ज्युनिअर हायस्कूलमध्ये शिकवलं होतं. तो अद्यापही अल्पवयीन आहे,' अशी माहिती शिक्षकानं दिली आणि महमूदचा पर्दाफाश झाला. महमूदला तिकीट देण्याच्या तयारीत असलेल्या पक्षानं आधी हा विरोधकांचा डाव असल्याचा दावा केला. पण सातत्यानं पुरावे समोर आल्यानं पक्षाकडे कोणताही पर्याय उरला नाही. यानंतर पक्षानं महमूदची हकालपट्टी केली.