हा उपाय स्वस्त, सुरक्षित आणि पर्यावरणपूरक असल्याने किचन तसेच बाथरूम सिंक साफ करण्यासाठी अत्यंत प्रभावी ठरतो.

घरातील किचन किंवा बाथरूममधील सिंक तुंबण्यामागे अनेक कारणे असतात. विशेषतः स्वयंपाकघरातील सिंकमध्ये भांडी धुताना अन्नाचे छोटे तुकडे, तेलकट पदार्थ, चहा किंवा कॉफीचे अवशेष ड्रेनमध्ये जातात. कालांतराने हे पदार्थ पाइपमध्ये साचू लागतात आणि चिकट थर तयार होतो. त्याचबरोबर साबणाचा थर, केस, धूळ आणि इतर घाणही ड्रेनेजमध्ये अडकते. त्यामुळे पाण्याचा प्रवाह हळूहळू कमी होतो आणि सिंकमध्ये पाणी साचू लागते. वेळेवर साफसफाई केली नाही तर ड्रेनेज पूर्णपणे ब्लॉक होण्याची शक्यता वाढते.

बेकिंग सोडा आणि व्हिनेगर हे सिंक साफ करण्यासाठी अत्यंत प्रभावी घरगुती उपाय मानले जातात. बेकिंग सोडा हा सौम्य अल्कलाइन पदार्थ असून व्हिनेगरमध्ये आम्लीय गुणधर्म असतात. हे दोन्ही पदार्थ एकत्र आल्यावर रासायनिक प्रतिक्रिया होऊन फेस तयार होतो. हा फेस पाइपमध्ये साचलेली घाण, तेलकट थर, अन्नाचे कण आणि दुर्गंधी दूर करण्यास मदत करतो. विशेष म्हणजे हा उपाय पाइपला नुकसान पोहोचवत नाही आणि बाजारातील तीव्र रासायनिक क्लिनरपेक्षा अधिक सुरक्षित मानला जातो. तसेच हा पर्यावरणपूरक आणि कमी खर्चात सहज करता येणारा उपाय असल्याने अनेकजण याचा वापर करतात.

सिंकमधील अतिरिक्त पाणी काढा
सर्वप्रथम सिंकमध्ये साचलेले पाणी एखाद्या कप किंवा भांड्याच्या मदतीने बाहेर काढा. त्यामुळे क्लिनिंग प्रक्रिया अधिक प्रभावी होते.
बेकिंग सोडा टाका
आता ड्रेनमध्ये एक कप बेकिंग सोडा टाका. शक्य असल्यास तो पूर्णपणे ड्रेनच्या आत जाईल याची काळजी घ्या.
त्यावर व्हिनेगर ओता
यानंतर हळूहळू एक कप व्हिनेगर ड्रेनमध्ये ओता. लगेच फेस तयार होऊ लागेल. हीच रासायनिक प्रक्रिया पाइपमधील घाण सैल करण्याचे काम करते.
ड्रेन झाकून ठेवा
फेस बाहेर येऊ नये म्हणून ड्रेनवर झाकण किंवा कापड ठेवा.१५ ते २० मिनिटे तसेच राहू द्या.
गरम पाणी ओता
यानंतर एक मोठे भांडे गरम पाणी ड्रेनमध्ये ओता. यामुळे सैल झालेली घाण आणि तेलकट पदार्थ बाहेर निघून जातात.
आवश्यकता असल्यास प्रक्रिया पुन्हा करा
जर सिंक खूपच तुंबलेले असेल तर ही प्रक्रिया पुन्हा एकदा करा.

• उकळते पाणी प्लास्टिक पाइपमध्ये टाकताना काळजी घ्या.
• केमिकल क्लिनर वापरल्यानंतर लगेच हा उपाय करू नका.
• हात संवेदनशील असतील तर हातमोजे वापरा.
• ड्रेन पूर्णपणे बंद असेल तर प्लंबरची मदत घ्यावी.

बाजारातील केमिकल क्लिनरपेक्षा हा उपाय कसा चांगला?
अनेक केमिकल क्लिनर लगेच परिणाम देतात, पण त्यात असलेली तीव्र रसायने पाइप खराब करू शकतात. विशेषतः जुने पाइप असतील तर गंज येण्याची शक्यता वाढते. तसेच अशा क्लिनरचा वासही त्रासदायक असतो. त्याच्या तुलनेत बेकिंग सोडा आणि व्हिनेगर नैसर्गिक आहेत कमी धोकादायक आहेत घरातील मुलं आणि पाळीव प्राण्यांसाठी सुरक्षित आहे तसेच वारंवार वापरता येतात.

खालील परिस्थितीत तज्ज्ञांची मदत घेणे आवश्यक ठरू शकते
पाणी पूर्णपणे खाली जात नसेल
वारंवार ड्रेन ब्लॉक होत असेल
पाइपमधून गळती होत असेल
दुर्गंधी खूप वाढली असेल
घरातील इतर ड्रेनेजही बंद होत असतील