मुंबई - आमिर खान आणि पूजा भट्ट यांनी १९९१ साली प्रदर्शित झालेल्या 'दिल है के मानता नहीं' या चित्रपटात एकत्र काम केलं होतं. नुकत्याच दिलेल्या एका मुलाखतीत, पूजा भट्टनं आमिरसोबतच्या तिच्या नात्याबद्दल मनमोकळेपणानं सांगितलंय.
आम्ही अगदी टॉम अँड जेरीसारखे होतो
विकी लालवानीसोबतच्या संभाषणात पूजा भट्ट आमिर खानबद्दल बोलताना म्हणाली की, 'तो नेहमीच बरोबर नसायचा आणि आम्ही दोघेही एकमेकांची खूप चेष्टा करायचो. आम्ही अगदी टॉम अँड जेरीसारखे होतो. आम्ही नेहमी एकमेकांना त्यांची जागा दाखवून देत होतो.'
आमच्यात नक्कीच एक आकर्षण होतं
चित्रपटादरम्यान दोघांमध्ये रोमँटिक नातं होतं का? असं विचारलं असता पूजा म्हणाली, 'तुम्ही हा प्रश्न आमिरला विचारायला हवा. मी खूप आकर्षक होते, नाही का? तसं झालं असतं तर तुम्ही त्याला दोष दिला असता का? मला आमिर खान खूप आवडायचा. जेव्हा कॅमेरा सुरू असायचा, तेव्हा आम्ही एकमेकांच्या प्रेमात पूर्णपणे हरवून जायचो. आमच्यात नक्कीच एक आकर्षण होतं, उत्तम केमिस्ट्री होती. पण त्या आकर्षणाचं खऱ्या आयुष्यात नात्यात रूपांतर झालं नाही.'
सिनेमाची आठवण सांगताना पूजा भट्ट म्हणाली, 'आमिर त्याच्या सीनचा सराव करायचा. काहीजण त्याला इतरांच्या कामात ढवळाढवळ करणारा म्हणतील किंवा ज्याला सिनेमाच्या प्रत्येक गोष्टीत रस असतो असा व्यक्ती म्हणतील. मी त्याच्याकडून खूप काही शिकले. त्याची अभिनयातील अचूकता, तो अभिनेता म्हणून परफेक्ट आहे.'
दरम्यान, 'दिल है की मानता नहीं' या चित्रपटाचं दिग्दर्शन महेश भट्ट यांनी केलं होतं आणि सिनेमाची निर्मिती गुलशन कुमार यांनी केली होती. या चित्रपटात पूजा भट्ट पहिल्यांदाच मुख्य भूमिकेत दिसली होती. अनुपम खेर, समीर चित्रे आणि टिकू तलसानिया यांनीही चित्रपटात महत्त्वाच्या भूमिका साकारल्या होत्या, तर दीपक तिजोरी यांनी विशेष पाहुण्या कलाकाराची भूमिका केली होती. 'दिल है की मानता नहीं' हा एक रोमँटिक कॉमेडी सिनेमा असून प्रेक्षकांकडून या सिनेमाला चांगला प्रतिसाद मिळाला आणि हा सिनेमा बॉक्स ऑफिसवर यशस्वी ठरला.