अनेकजण गंभीर अवस्थेत विविध रुग्णालयांत उपचार घेत असून मृतांचा आकडा वाढण्याची भीती व्यक्त केली जात आहे. या प्रकरणी पिंपरी-चिंचवड पोलिस आणि राज्य उत्पादन शुल्क विभागाने १० जणांना अटक केली आहे. दरम्यान, या प्रकरणाचा तपास आता राज्य गुन्हे अन्वेषण विभागाकडे (सीआयडी) वर्ग करण्यात आला आहे.
'पीआय'सह तिघे निलंबित
विषारी दारुमुळे झालेल्या मृत्यूप्रकरणी पुणे आणि पिंपरी-चिंचवड पोलिस दलातील पाच अधिकारी आणि चार कर्मचाऱ्यांना निलंबित करण्यात आले. पुण्याचे पोलिस आयुक्त अमितेशकुमार आणि पिंपरी-चिंचवडचे पोलिस आयुक्त यांनी याबाबतचे आदेश काढले. हडपसर पोलिस ठाण्याचे वरिष्ठ निरीक्षक संजय मोगले, सहायक निरीक्षक हसीन सिकलगार आणि उपनिरीक्षक हसन मुलाणी अशी पुणे पोलिसांतील निलंबित अधिकाऱ्यांची नावे आहेत. दापोडी पोलिस ठाण्याचे वरिष्ठ निरीक्षक विजय वाघमारे, उपनिरीक्षक राजू भास्कर, कर्मचारी जयदीप सोनवणे, नवनाथ पोटे, सागर जाधव, विशाल काळे यांच्यावर कारवाई करण्यात आली आहे.नागरिकांनी गावठी दारू प्यायली
दापोडी परिसरातील एका हातभट्टी अड्ड्यावर मंगळवारी रात्री आणि बुधवारी सकाळी नागरिकांनी गावठी दारू प्यायली. त्यांना डोळ्यांची जळजळ, चक्कर येणे, अंधारी येणे, श्वसनास त्रास, छातीत दुखणे आणि तोंडातून फेस येणे अशी लक्षणे जाणवली. काहींची प्रकृती बिघडल्याने त्यांना रुग्णालयात नेण्यात आले. मात्र, तेथे पोहोचण्यापूर्वीच त्यांचा मृत्यू झाला. यशवंतराव चव्हाण स्मृती रुग्णालयात (वायसीएम) बुधवारी बाबा शेख (वय ४५) यांचा मृत्यू झाला. त्यानंतर गुरुवारी राजेश शांताराम राजपूत (५०), अकबर अझीमखान पठाण (४८), आनंद पांडेराव देसाई (५३), आनंद काशिनाथ निकाळजे (६४), पांडुरंग सखाराम फुगे (५३), विजय प्रकाश राठोड (३१), राजेंद्र प्रकाश राठोड (३४) या सात जणांचा मृत्यू झाला. शुक्रवारी अक्षय अशोक अवसरमल (२८), सचिन रामचंद्र नेटके (३६), भीमण्णा बसन्ना नागराल (२७) आणि सुरप्पा मनप्पा बंगारी (वय ५५) आणि कबीर अब्दुल शहा (वय ४५, रा. फुगेवाडी) यांचा मृत्यू झाला.व्हिसेरा लवकरच फॉरेन्सिक लॅबकडे
हडपसर परिसरात अरुण वामन डाडर (वय ६०), यशवंत रघुनाथ पवार (वय ६४), दत्ता माधवराव सूर्यवंशी (वय ५५) आणि अशोक रमेश चव्हाण यांचा मृत्यू झाला आहे. तर विजय भुकूरलाल शर्मा (वय ४५) आणि प्रवीण जाधव (वय ५२) यांचाही दारू पिऊन मृत्यू झाल्याचा दावा स्थानिक नागरिकांनी केला आहे. या प्रकरणी राज्य उत्पादन शुल्क विभाग, पुणे पोलिस आणि दापोडी पोलिसांनी मुख्य सूत्रधारासह आठ ते १० जणांना अटक केली आहे. फुगेवाडी आणि हडपसर परिसरात मिथेनॉल मिसळून गावठी दारू तयार करून विक्री केल्याचा प्राथमिक निष्कर्ष तपासात समोर आला आहे. सर्व मृतांचे शवविच्छेदन करण्यात आले असून, त्यांचा व्हिसेरा लवकरच फॉरेन्सिक लॅबकडे पाठविला आहे. त्या अहवालानंतर मृत्यूचे नेमके कारण स्पष्ट होईल.कोणाकोणाला अटक?
कर्नेलसिंह तखतसिंह विरका (७३), गुरमंगतसिंह कर्नेलसिंह विरका (४५), योगेश रामचंद्र वानखेडे उर्फ सिंकदर राठोड हा सूत्रधार असल्याची माहिती मिळाली आहे. पुणे आणि पिंपरी-चिंचवड परिसरात दारूमधील 'मिथेनॉल'मुळे या रुग्णांना विषबाधा झाल्याचा प्राथमिक अंदाज डॉक्टरांसह न्यावैद्यक तज्ज्ञांनी व्यक्त केला आहे. अल्पावधीत झालेल्या संशयास्पद मृत्यूंमधील रुग्णांमध्ये चक्कर येणे, श्वास घेण्यास त्रास, तोंडातून फेस येणे, धूसर दिसणे, गुंगी येणे, छातीत दुखणे आणि हृदयाचे ठोके मंदावणे अशी समान लक्षणे आढळून आली आहेत. या संपूर्ण प्रकरणात मिथेनॉलचा पुरवठा कुठून झाला, अवैध दारू विक्रीला कोणाचे संरक्षण होते आणि या रॅकेटमध्ये आणखी कोणाचा सहभाग आहे, याचा तपास सीआयडी करणार आहे.
