प्रशांत आहेर, पुणे: कात्रज ते येरवड्यादरम्यानच्या भूमिगत रस्त्याचा आराखडा अंतिम टप्प्यात पोहोचला असून, जमिनीवरील दुहेरी उड्डाणपुलाप्रमाणेच भूगर्भात दोन स्तरांचा भूमिगत मार्ग (डबल डेकर ट्विन टनेल) निर्माण करण्याची योजना तयार आहे.
येरवडा-कात्रजसह एकूण ५४ किलोमीटरच्या भुयारी रस्त्यासांठी ३६,४१५ कोटी रुपयांचा खर्च अपेक्षित आहे. या प्रकल्पासाठी सुमारे ५४ हेक्टर जमिनीचे संपादन करावे लागेल, असा प्राथमिक अंदाज आहे. या भुयारी मार्गांमध्ये आपत्कालीन स्थितीत सुरक्षितपणे बाहेर पडण्यासाठी पर्यायी मार्गांचा विचार (एस्केप रूट) असतील.
माहिती सरकारकडे सादर
सल्लागार संस्थेने या अभ्यासासाठी पुण्यातील ४५ ठिकाणी २४ तास वाहनांची मोजणी, वळण घेणाऱ्या वाहनांची संख्या, प्रवास चालू आणि प्रवास बंद होणारी प्राधान्याची ठिकाणे, अशा विविध प्रकारची सर्वेक्षण केली आहेत. त्यावर आधारित 'ट्रॅफिक मॉडेलिंग' करण्यात आले. वैभव टॉकीज-हडपसर, हॅरिस ब्रिज, शनिवारवाडा, गणेशखिंड रस्ता, खराडी बायपास यांसारख्या ठिकाणी प्रचंड वाहतुकीचा ताण असल्याचे या अभ्यासात आढळले आहे. सल्लागार संस्थेने केलेल्या अभ्यासात सात संभाव्य बोगद्यांचा विचार करण्यात आला आहे. त्यापैकी 'येरवडा-खडी मशिन' हा उत्तर-दक्षिण पुण्याला जोडणारा प्राधान्य मार्ग म्हणून निश्चित केला आहे. त्याशिवाय, 'जगताप डेअरी-सिंहगड रस्ता' आणि 'येरवडा-हिंजवडी' हे मार्गही प्रस्तावित आहेत.
अवघ्या सात मिनिटांत प्रवास
अहवालानुसार हा प्रकल्प 'बांधा वापरा हस्तांतरित करा' (बीओटी) पद्धतीने राबविण्याचा विचार असून, ४० वर्षांचा कालावधी प्रस्तावित आहे. हा निधी इक्विटी, कर्ज आणि सरकारी अनुदानाद्वारे उभा करण्याचे 'मॉडेल' अहवालात सुचविण्यात आले आहे. मात्र, हा प्रकल्प आर्थिकदृष्ट्या सक्षम करण्यासाठी ३७ टक्के 'व्हायबिलिटी गॅप फंडिंग' आवश्यक आहे, असेही अहवालात म्हटले आहे.