तीन दशकांपूर्वी आलेल्या रामायण महाभारत मालिकांनी घराघरात आपली छाप पाडली. या मालिका संपून इतका काळ लोटला तरी प्रेक्षक त्यातील कलाकारांना विसरलेले नाही. बी.आर. चोप्रा यांच्या 'महाभारत' या टीव्ही मालिकेतील पात्रे, प्रसंग आणि ती पात्रे साकारणारे कलाकार आजही प्रेक्षकांच्या मनात खोलवर रुजलेले आहेत.
मालिकेतील द्रौपदीच्या वस्त्रहरणाचा प्रसंग हा आजही प्रेक्षकांना लख्ख आठवतो.
करोनाच्या काळात म्हणजेच सहा वर्षांपूर्वी जेव्हा 'महाभारत'चे दूरदर्शनवर पुन:प्रसारण झाले, तेव्हा वस्त्रहरणाचा तो प्रसंग पाहताना रूपा गांगुली यांच्या अंगावर काटा आला. अभिनेत्री रुपा गांगुली यांनीच 'महाभारत'मध्ये द्रौपदीचे पात्र साकारले होते आणि वस्त्रहरणाचा तो प्रसंग त्यांनी स्वतःच अभिनित केला होता. त्या विशिष्ट प्रसंगाने त्यांना दहा वर्षांपूर्वी घडलेल्या एका भयानक घटनेची तीव्र आठवण करून दिली. ही घटना म्हणजे त्यांच्यावर झालेला एक हल्ला. या हल्ल्यात हल्लेखोरांच्या एका टोळीने त्यांना निर्दयपणे मारहाण केली होती, जमिनीवर फेकून दिले होते. त्यामुळे त्यांना मेंदूमध्ये दोन ठिकाणी रक्तस्राव झाला होता.
2020 मध्ये, रूपा गांगुली यांनी आपल्या 'X' (पूर्वीचे ट्विटर) वर 'महाभारत'मधील वस्त्रहरणाच्या सीनचा एक व्हिडिओ शेअर केला होता. काकद्वीपजवळ असलेल्या ईश्वरपूर गावातून कोलकात्याकडे परतत असताना, काही अज्ञातांनी रूपा गांगुली यांच्यावर हल्ला केला होता.
जुन्या जखमांना जाग
द्रौपदीच्या वस्त्रहरणाचा व्हिडिओ शेअर करताना रूपा गांगुली यांनी लिहिले: "गेल्या काही दिवसांपासून, 22 मे 2016 रोजी डायमंड हार्बर येथे घडलेली ती घटना मला पुन्हा पुन्हा आठवत आहे. 17-18 लोकांच्या एका गटाने, पोलिसांना सोबत घेऊन, मला माझ्या गाडीतून बाहेर ओढले आणि रस्त्यावरच मला निर्दयपणे मारहाण केली होती. त्यांनी माझ्या गाडीची तोडफोड केली आणि त्यामुळे मला दोनदा ब्रेन हॅमरेज झाला. केवळ नशिब बलवत्तर म्हणून मी मेले नाही. मी एक 'रॅली ड्रायव्हर' आहे; त्यामुळेच मी त्यातून सावरले."
तो सीन पाहून दाटून आल्या आठवणी
'वस्त्रहरण सीनबद्दल बोलायचे झाल्यास, या सीनचे चित्रीकरण करताना रूपा गांगुली थोड्या गांगरल्या होत्या. दिग्दर्शकाने "कट" म्हटल्यानंतरही, रूपा गांगुली अर्धा तास पुढे रडतच राहिल्या. त्यांना शांत करण्यासाठी मालिकेच्या टीमला साधारणपणे तीस मिनिटे लागली. शिवाय, या सीननंतर रूपा गांगुलीने अभिनेता विनोद कपूर यांच्याशी बोलणे पूर्णपणे थांबवले आणि त्यांच्याशी पुढे मैत्रीचे संबंधही ठेवले नाहीत. इंडिया टुडेला दिलेल्या एका मुलाखतीत खुद्द रूपा गांगुलीनीच ही गोष्ट सांगितली. विनोद कपूर यांनी महाभारतामध्ये वस्त्रहर करणाऱ्या दुःशासनाची भूमिका साकारली होती.
विनोद कपूरशी बोलणे बंद
रूपा गांगुलीने खुलासा केला की, ती दोन वर्षे 'द्रौपदी'च्या भूमिकेत पूर्णपणे समरस झालेली होती. त्या भूमिकेतून स्वतःला पूर्णपणे बाहेर काढण्यासाठी तिला 2 वर्षे लागली. रूपा म्हणाल्या, "मग तो वस्त्रहरणाच्या आधीचा काळ असो किंवा नंतरचा; दुःशासन साकारणाऱ्या विनोद कपूर यांच्याशी माझे कधीच मैत्रीपूर्ण संबंध नव्हते. ते चांगले असले तरी त्यांच्या सोबत असताना मला नेहमीच काहीशी अस्वस्थता जाणवायची."