न्यू चंदीगढ: कर्णधार शुभमन गिलच्या शानदार आणि स्फोटक शतकामुळे गुजरात टायटन्सने आयपीएल 2026 च्या अंतिम फेरीत आपले स्थान निश्चित केले आहे. शुक्रवारी झालेल्या क्वालिफायर 2 मध्ये गुजरात टायटन्सने राजस्थान रॉयल्सचा सात गडी राखून पराभव केला.
आता 31 मे रोजी अहमदाबाद येथील नरेंद्र मोदी स्टेडियमवर होणाऱ्या अंतिम सामन्यात गुजरात टायटन्सचा सामना रॉयल चॅलेंजर्स बेंगळूरशी होईल, जिथे दोन्ही संघ आपले दुसरे आयपीएल विजेतेपद पटकावण्याचे ध्येय ठेवतील. राजस्थानने सामना गमावल्यानंतर मात्र डगआऊटमध्ये बसलेला वैभव सूर्यवंशीचा एक व्हिडिओ आता जोरदार व्हायरल होत आहे.
वैभवला अश्रू अनावर
मात्र, वैभवसाठी हा हंगाम एका स्वप्नापेक्षा कमी नव्हता. त्याने या मोसमात 16 सामन्यांमध्ये एकूण 776 धावा केल्या आहेत आणि सध्या या मोसमाची ऑरेंज कप त्याच्याकडे आहे. त्याच्या प्रभावी कामगिरीनंतरही, वैभव आपल्या संघाला आयपीएल ट्रॉफी जिंकून देण्यात अपयशी ठरला त्यामुळे त्याला जास्त लाईट वाटले.
यापूर्वी, नाणेफेक जिंकून प्रथम फलंदाजी करण्याचा निर्णय घेतलेल्या राजस्थान रॉयल्सची सुरुवात अत्यंत निराशाजनक झाली. त्यांनी यशस्वी जैस्वाल (1) आणि ध्रुव जुरेल (7) यांच्या रूपाने अवघ्या 9 धावांत दोन महत्त्वाच्या विकेट्स गमावल्या. सुरुवातीच्या धक्क्यांनंतर, राजस्थानने उल्लेखनीय पुनरागमन केले आणि आपल्या निर्धारित 20 षटकांत 6 गडी गमावून 214 धावांचा डोंगर उभा केला. गुजरातकडून जेसन होल्डर आणि कागिसो रबाडा यांनी प्रत्येकी दोन बळी घेतले, तर मोहम्मद सिराज आणि प्रसिद्ध कृष्णा यांनी प्रत्येकी एक बळी घेतला.
सुरुवातीच्या धक्क्यांनंतर, वैभव सूर्यवंशीने राजस्थान रॉयल्ससाठी आघाडी घेतली. वैभवने अनुभवी अष्टपैलू रवींद्र जडेजासोबत मिळून संघाला अडचणीतून बाहेर काढले आणि एक मजबूत भागीदारी रचली. वैभवने मैदानाच्या सर्व बाजूंनी फटकेबाजी करत, 7 षटकार आणि 8 चौकारांसह अवघ्या 47 चेंडूंमध्ये स्फोटक 96 धावा केल्या. मात्र, सलग दुसऱ्या सामन्यात त्याचे शतक हुकले. जडेजा 35 चेंडूंमध्ये 45 धावांवर नाबाद राहिला, तर डोनोव्हन फरेराने अखेरच्या षटकांमध्ये अवघ्या 11 चेंडूंमध्ये 38 धावांची धडाकेबाज खेळी करत संघाला 200 धावांच्या पुढे नेले.
गुजरात टायटन्सने आयपीएलच्या इतिहासात तिसऱ्यांदा अंतिम फेरीत स्थान मिळवले आहे. 2022 मध्ये आपल्या पदार्पणाच्या हंगामात, गुजरातने राजस्थान रॉयल्सला हरवून आपले पहिले विजेतेपद पटकावले होते. त्यानंतर, 2023 मध्ये संघ अंतिम फेरीत पोहोचला, परंतु चेन्नई सुपर किंग्सकडून पराभूत झाला.