न्यू चंदीगढ: आयपीएल एलिमिनेटरमध्ये वैभव सूर्यवंशीने षटकारांचा वर्षाव केला. मुल्लानपूर येथील महाराजा यादवेंद्र सिंग आंतरराष्ट्रीय क्रिकेट स्टेडियमवर सूर्यवंशीने 29 चेंडूंमध्ये 97 धावा ठोकल्या.

त्याने 12 षटकार आणि 5 चौकार मारले, मात्र त्याचे शतक हुकले. वैभव सूर्यवंशीच्या खेळीचे सर्वांनी कौतुक केले. मात्र, त्याच्या बाद झाल्यानंतर काव्या मारनने असे काही केले ज्यामुळे चाहते संतापले. पण मॅचनंतर तिने जे केले त्याचे मात्र कौतुक होत आहे.

जेव्हा वैभव सूर्यवंशीने 97 धावांवर प्रफुल्ल हिंगेकडे आपली विकेट गमावली, तेव्हा तो खेळाडू अत्यंत निराश दिसला. आपले शतक हुकले यावर सूर्यवंशीचा विश्वासच बसत नव्हता. सूर्यवंशी दुःखात असताना, अभिषेक शर्मासह सनरायझर्स हैदराबादचे काही खेळाडू त्याच्या चांगल्या खेळीबद्दल त्याचे अभिनंदन करताना दिसले. मात्र, काव्या मारन स्टँड्समध्ये बसून राहिली, ज्यामुळे चाहते संतापले. काव्या मारन तिच्या जागेवर बसून टाळ्या वाजवताना दिसली. सूर्यवंशीच्या खेळीला दाद देण्यासाठी काव्याने उभे राहून टाळ्या वाजवायला हव्या होत्या, त्यामुळे तिने चांगली कामगिरी केली नाही का, असा प्रश्न चाहत्यांनी उपस्थित केला. काव्याचा हा व्हिडिओ सोशल मीडियावर व्हायरल होत आहे.

पण मॅचनंतर ती वैभवच्या जवळ गेली आणि हस्तांदोलन करुन त्याचे कौतुक केले. खूप चांगला खेळलाय, अभिनंदन असं काव्या म्हणताना दिसतीये. यानंतर वैभवने थँक्यू मॅम म्हणत तिला प्रत्युत्तर दिले. आता या कृतीमुळे चाहते काव्याचं कौतुक करताना दिसत आहे.

एलिमिनेटर सामन्यात राजस्थान नाणेफेक हरले, पण वैभव सूर्यवंशी जराही विचलित झाला नाही. सूर्यवंशीने पहिल्याच षटकात षटकार मारून आपला इरादा स्पष्ट केला. त्याने आठ षटकार मारत 16 चेंडूंमध्ये आपले अर्धशतक पूर्ण केले. आयपीएलच्या इतिहासातील सर्वात जलद शतक करण्याची संधी असताना सूर्यवंशी वेगाने शतकाच्या दिशेने वाटचाल करत होता, पण तो अपयशी ठरला. तो 29 व्या चेंडूवर बाद झाला. ख्रिस गेलने आयपीएल 2013 मध्ये अवघ्या 30 चेंडूंमध्ये शतक झळकावले होते.

वैभव सूर्यवंशीने आयपीएल 2026 मध्ये 680 धावांसह सर्वाधिक धावा केल्या आहेत. तो ऑरेंज कॅपच्या शर्यतीत आघाडीवर आहे. विशेष म्हणजे, त्याने आपल्या 680 धावांपैकी 610 धावा चौकार-षटकारांनी केल्या आहेत. एकाच हंगामात सर्वाधिक षटकार मारण्याचा विक्रमही वैभव सूर्यवंशीच्या नावावर आहे. त्याने आतापर्यंत 65 षटकार मारून ख्रिस गेलचा 59 षटकारांचा विक्रम मागे टाकला आहे. आयपीएल सामन्यात 12 षटकार मारण्याची वैभव सूर्यवंशीची ही दुसरी वेळ असून, हा एक विक्रम आहे.