मुंबई : अखेर तो ऐतिहासिक क्षण आला. आयपीएल 2026 गाजवल्यानंतर 15 वर्षीय वैभव सूर्यवंशीने टीम इंडियासाठी आंतरराष्ट्रीय पदार्पण केले. मँचेस्टरमध्ये इंग्लंडविरुद्धच्या दुसऱ्या टी-20 सामन्यात त्याला अंतिम अकरामध्ये संधी मिळाली.

या पदार्पणासह वैभव भारताकडून आंतरराष्ट्रीय क्रिकेट खेळणारा सर्वात तरुण खेळाडू ठरला आहे. अवघ्या 15 वर्षे 99 दिवसांच्या वयात वैभवने टीम इंडियाची जर्सी परिधान केली.

याआधी हा विक्रम सचिन तेंडुलकर यांच्या नावावर होता. सचिनने 1989 मध्ये पाकिस्तानविरुद्ध 16 वर्षे 205 दिवसांचा असताना आंतरराष्ट्रीय क्रिकेटमध्ये पदार्पण केले होते. आता तब्बल 37 वर्षांनंतर हा विक्रम वैभवच्या नावावर गेला आहे.

सामन्यापूर्वी टीम इंडियाचा उपकर्णधार तिलक वर्माने वैभवला पदार्पणाची कॅप दिली. हा क्षण त्याच्यासाठी खूप खास होता.

कॅप हातात घेताच वैभवच्या डोळ्यांत अश्रू तरळले. त्याचा भावूक क्षण सोशल मीडियावरही मोठ्या प्रमाणात व्हायरल झाला.

आयपीएल 2026 मध्ये वैभवने जबरदस्त फलंदाजी करत सर्वांचे लक्ष वेधले होते. त्यानंतर त्याची आयर्लंड आणि इंग्लंड दौऱ्यासाठी भारतीय टी-20 संघात निवड झाली.

मात्र आयर्लंडविरुद्धच्या दोन्ही सामन्यांत आणि इंग्लंडविरुद्धच्या पहिल्या टी-20मध्ये त्याला संधी मिळाली नव्हती.

संजू सॅमसनला सलग अपयश आल्यानंतर अखेर टीम मॅनेजमेंटने वैभववर विश्वास दाखवला आणि दुसऱ्या टी-20मध्ये त्याला पदार्पणाची संधी दिली.

या सामन्यात भारताचा कर्णधार श्रेयस अय्यरने नाणेफेक जिंकून प्रथम फलंदाजीचा निर्णय घेतला आहे. यावेळी वैभवला सलामीवीर म्हणून पाठवले होते, अभिषेकसोबत सुरुवात करताना वैभव सूर्यवंशी १० चेंडू १४ धावांत बाद झाला. वैभवने आपल्या खेळीत दोन षटकार मारले.

वैभव सूर्यवंशी, अभिषेक शर्मा, इशान किशन, श्रेयस अय्यर (कर्णधार), तिलक वर्मा, शिवम दुबे, अक्षर पटेल, हर्षित राणा, रवी बिष्णोई, अर्शदीप सिंग आणि वरुण चक्रवर्ती.