यामुळे CSMIAवरील अतिरिक्त क्षमता उपलब्ध होईल आणि टर्मिनल-1चा पुनर्विकास टप्प्याटप्प्याने करता येणार आहे.

मुंबई इंटरनॅशनल एअरपोर्ट लिमिटेड (MIAL) कडून देशांतर्गत आणि आंतरराष्ट्रीय विमान कंपन्यांसोबत याबाबत चर्चा सुरू आहे. संक्रमण काळात प्रवाशांना कमीत कमी त्रास होईल, यासाठी एअरलाइन्स, विमानतळ प्रशासन आणि संबंधित सरकारी यंत्रणांमध्ये समन्वय साधला जात आहे.

CSMIAच्या टर्मिनल-1 आणि टर्मिनल-2मधून दररोज सुमारे 950 विमानांची ये-जा होते.

टर्मिनल-1ची वार्षिक प्रवासी क्षमता सुमारे 1.5 कोटी, तर टर्मिनल-2ची क्षमता सुमारे 4 कोटी प्रवाशांची आहे.

त्यामुळे नवी मुंबई विमानतळावर काही सेवा हलवणे आणि मुंबई विमानतळावरील ऑपरेशन्सचे पुनर्वाटप करणे हा टर्मिनल-1च्या पुनर्विकासादरम्यान क्षमता व्यवस्थापनाचा महत्त्वाचा भाग ठरणार आहे.

दरम्यान, नवी मुंबई आंतरराष्ट्रीय विमानतळावर 15 जुलै 2026 पासून आंतरराष्ट्रीय विमानसेवा सुरू झाली.

एअर इंडिया एक्स्प्रेसच्या IX-207 या अबूधाबीला जाणाऱ्या विमानाने NMIAवरून आंतरराष्ट्रीय उड्डाणांना सुरुवात केली.

आता मुंबईच्या एव्हिएशन नेटवर्कमध्ये NMIAचा सहभाग वाढत असल्याने CSMIAवरून चालणाऱ्या काही निवडक सेवा भविष्यात नवी मुंबई विमानतळावर हलवल्या जाऊ शकतात.

ऑक्टोबर 2026 किंवा त्यानंतर विमान प्रवासाचे बुकिंग केलेल्या प्रवाशांनी विशेष काळजी घेणे गरजेचे आहे.

तुमची फ्लाइट मुंबई विमानतळावरूनच सुटेल, असे गृहीत धरू नका. एअरलाइनने फ्लाइटचे ऑपरेशन CSMIAवरून NMIAला हलवले किंवा मुंबई विमानतळावरील टर्मिनल बदलले, तर संबंधित प्रवाशांना त्याची माहिती देण्यात येईल.

प्रवासापूर्वी—

एअरलाइनचे ई-मेल आणि SMS नियमित तपासा.

तिकीटावरील Airport आणि Terminalची माहिती तपासा.

प्रवासाच्या काही दिवस आधी पुन्हा तपासणी करा.

माहिती स्पष्ट नसल्यास एअरलाइनशी संपर्क साधा.

फ्लाइट नवी मुंबईतून असल्यास अतिरिक्त प्रवासाचा वेळ गृहीत धरा.

कारण CSMIA आणि Navi Mumbai International Airport ही दोन वेगवेगळी विमानतळे आहेत. चुकीच्या विमानतळावर पोहोचल्यास फ्लाइट मिस होण्याचा धोका आहे.

सध्या एअर इंडियाच्या देशांतर्गत आणि आंतरराष्ट्रीय सेवा मुंबई विमानतळाच्या टर्मिनल-2वरून चालतात.

मात्र, ऑक्टोबरच्या संक्रमण प्रक्रियेत एअर इंडियाच्या नेमक्या कोणत्या आंतरराष्ट्रीय सेवा नवी मुंबई विमानतळावर हलवल्या जातील, याबाबत अद्याप स्पष्टता नाही.

त्यामुळे मुंबई-न्यूयॉर्क, मुंबई-नेवार्क, मुंबई-लंडन किंवा मुंबई-सिंगापूर यांसारख्या मार्गांवर प्रवास करणाऱ्या प्रवाशांनी सध्याच्या बुकिंगवर अवलंबून न राहता एअरलाइनकडून मिळणारी ताजी माहिती तपासणे महत्त्वाचे आहे.

थोडक्यात, 1 ऑक्टोबरपासून मुंबईच्या विमानसेवांचे चित्र बदलण्याची शक्यता आहे. त्यामुळे फ्लाइट बुकिंग करताना फक्त वेळ आणि तिकीटाचे दर न पाहता, विमानतळ आणि टर्मिनलची माहितीही आवर्जून तपासा.