संबंधित विद्यार्थिनीने शाळेच्या अधीक्षकांकडे तक्रार करत आरोपीने आपण एकटी असताना अयोग्य पद्धतीने स्पर्श केल्याचे सांगितले.

यानंतर शाळा प्रशासनाने शहापूर पोलिसांशी संपर्क साधला. प्राथमिक चौकशीदरम्यान आणखी काही विद्यार्थिनी पुढे आल्या आणि त्यांनीही आरोपीविरोधात अशाच प्रकारच्या तक्रारी केल्याचे पोलिसांनी सांगितले.

आतापर्यंत 22 अल्पवयीन विद्यार्थिनींनी आरोपीकडून अयोग्य स्पर्श किंवा लैंगिक छळ झाल्याचे आरोप केल्याची माहिती समोर आली आहे.

शहापूरच्या तेंभा गाव परिसरात ही निवासी आश्रमशाळा आहे. शाळा आणि वसतिगृह एकाच इमारतीत असल्याचे सांगण्यात येते. मुलांचे वसतिगृह दुसऱ्या मजल्यावर, तर मुलींचे वसतिगृह तिसऱ्या मजल्यावर आहे.

जेवण आणि दैनंदिन कामांसाठी विद्यार्थ्यांची इमारतीतील विविध भागांमध्ये नियमित ये-जा होत होती. याच हालचालींचा आरोपीने गैरफायदा घेत मुलींशी गैरवर्तन केल्याचा पोलिसांचा आरोप आहे.

शहापूर पोलिसांनी आरोपीविरोधात भारतीय न्याय संहिता (BNS) कलम 354 आणि पॉक्सो कायद्यातील संबंधित कलमांनुसार गुन्हा दाखल केला आहे.

उपविभागीय पोलीस अधिकारी विशाल नागरगोजे यांच्या माहितीनुसार, या प्रकरणाचा तपास सुरू असून कथित गैरप्रकार किती काळ आणि किती मोठ्या प्रमाणावर झाले, याचा तपास केला जात आहे.

आरोपीला अटक करून न्यायालयात हजर करण्यात आले. न्यायालयाने त्याला पोलीस कोठडी सुनावली. त्यानंतर त्याची रवानगी आधारवाडी कारागृहात करण्यात आल्याची माहिती आहे.

तपासादरम्यान आरोपीच्या पूर्वीच्या नोकरीबाबतही गंभीर प्रश्न उपस्थित झाले आहेत.

पोलिसांच्या माहितीनुसार, आरोपीला यापूर्वीही एका अन्य संस्थेतील अल्पवयीन मुलींशी संबंधित अशाच प्रकारच्या प्रकरणात अटक झाली होती. त्यानंतर त्याची जामिनावर सुटका झाली होती.

अशा आरोपांना सामोरे गेलेल्या व्यक्तीची अल्पवयीन मुली निवासी असलेल्या आश्रमशाळेत नियुक्ती कशी झाली, याचीही चौकशी आता केली जात आहे.

आरोपीविरोधात आणखी तक्रारी दाखल झाल्या आहेत का, तसेच आणखी कोणत्या विद्यार्थिनी या प्रकरणात बाधित झाल्या आहेत का, याचाही तपास पोलीस करत आहेत.

या घटनेनंतर संबंधित विद्यार्थिनींना आवश्यक समुपदेशन आणि मानसिक आधार देण्यात येणार असल्याचे अधिकाऱ्यांनी सांगितले आहे.

दरम्यान, पोलिसांचा तपास सुरू असून कथित गैरप्रकारातील इतर घटना किंवा संभाव्य पीडितांची संख्या याबाबतही माहिती घेतली जात आहे.