दादर (dadar) पश्चिम परिसरात मोठ्या प्रमाणावर वाहतूककोंडी (traffic) होत असल्याने वाहतूक पोलिसांनी विविध मार्ग तात्पुरते बंद करून बेस्ट बसमार्गांमध्ये (best bus) बदल केले आहेत. भवानी शंकर रोड 'अप' दिशेला वाहतुकीसाठी बंद करण्यात आला आहे.

तसेच त्यामुळे मार्ग क्रमांक 56, 88, 110, 151, 814, 164, 171, 201, 305, 128, 52 आणि 357 या बससेवा गोपीनाथ चव्हाण चौक येथून भवानी शंकर रोडमार्गे न जाता नामदार गोपाळ कृष्ण गोखले मार्गाने वळविण्यात आल्या आहेत.

या बस प्रबोधनकार ठाकरे चौक येथे उजवे वळण घेऊन राव बहादूर एस. के. बोले रोडमार्गे हनुमान मंदिर येथे डावे वळण घेऊन पुढे एन. सी. केळकर रोडमार्गे नियोजित मार्गाने जातील. हा बदल दुपारी 12 वाजल्यापासून लागू करण्यात आला आहे.

तसेच वरळी (worli) आगार विभागात दादर पश्चिम येथे वाढलेल्या वाहतूककोंडीमुळे एस. के. बोले रोड डाऊन दिशेला प्रबोधनकार ठाकरे चौकापर्यंत वाहतूक बंद करण्यात आली आहे.

त्यामुळे मार्ग क्रमांक 63, 165, 169, 172, 351 आणि 385 या बससेवा हनुमान मंदिर येथे उजवे वळण न घेता डॉक्टर यज्ञेश्वर विठ्ठल पुरंदरे चौकमार्गे पुढे भवानी शंकर रोडने गोपीनाथ चव्हाण चौक येथे उजवे वळण घेऊन काकासाहेब गाडगीळ मार्ग, शंकर घाणेकर मार्ग आणि स्वर्गीय एकनाथ ठाकूर चौक मार्गे अप्पासाहेब मराठे मार्गाने पुढे नियोजित मार्गावर धावतील.

हा बदल सायंकाळी 4.50 वाजल्यापासून लागू करण्यात आला आहे. दरम्यान, दादर स्टेशनकडून कबूतरखाना येथे येणारा मो. ची. जावळे मार्ग वाहतूक पोलिसांकडून बंद केला.

त्यामुळे मार्ग क्रमांक 118 ही बस दादर स्टेशन येथून डावे वळण घेऊन डी'सिल्वा रोडमार्गे विसावा हॉटेल येथे डावे वळण घेऊन एन. सी. केळकर रोडमार्गे पुढे नियोजित मार्गाने धावेल.