अनेकदा आपण केवळ चवीसाठी या मसाल्याचा वापर करतो, पण आयुर्वेदानुसार आणि आधुनिक विज्ञानानुसारही ओरेगॅनोमध्ये अनेक औषधी गुणधर्म लपलेले आहेत. ओरेगॅनोचा मुख्य घटक म्हणजे ओव्याची पाने, जी आपल्या पचनसंस्थेसाठी अत्यंत गुणकारी मानली जातात. बाजारात मिळणाऱ्या महागड्या ओरेगॅनोपेक्षा तुम्ही घरच्या घरी ओव्याची पाने, सुकी तुळस, लसूण पावडर, चिली फ्लेक्स आणि मिरी पावडर वापरून अधिक शुद्ध आणि आरोग्यदायी मसाला तयार करू शकता. मंद आचेवर हे घटक भाजून घरगुती ओरेगॅनो बनवणे अत्यंत सोपे आहे.

आरोग्याच्या दृष्टीने विचार केला तर, ओरेगॅनो हा केवळ चव वाढवणारा घटक नसून तो पोषक तत्वांचा खजिना आहे. ‘हेल्थलाईन’च्या अहवालानुसार, केवळ एक चमचा ओरेगॅनोमधून शरीराला आवश्यक असलेल्या ‘व्हिटॅमिन के’ची ५ ते ७ टक्के गरज पूर्ण होते. यामध्ये असणारी कार्व्हक्रोल आणि थायमोल ही नैसर्गिक तेले शक्तिशाली अँटीऑक्सिडंट्स म्हणून काम करतात. हे घटक शरीरातील पेशींना फ्री रॅडिकल्समुळे होणाऱ्या नुकसानापासून वाचवतात आणि दीर्घकालीन आजारांचा धोका कमी करतात. जर तुम्ही हा मसाला ताज्या भाज्या आणि फळांसोबत खाल्ला, तर त्याचे फायदे दुप्पट होतात.

इतकेच नव्हे तर, ओरेगॅनोमध्ये बॅक्टेरिया आणि विषाणूविरोधी (Anti-viral) गुणधर्म असतात. संशोधनानुसार, विविध प्रकारच्या संसर्गांशी लढण्यासाठी आणि शरीरातील सूज कमी करण्यासाठी ओरेगॅनो अत्यंत प्रभावी ठरतो. सतत होणारी मळमळ, पोटदुखी किंवा अतिसार यांसारख्या समस्यांवर ओरेगॅनोमधील घटक नैसर्गिक उपचार म्हणून काम करतात. शरीरातील अंतर्गत सूज कमी झाल्यामुळे हृदयरोग आणि मधुमेहाचा धोकाही टळण्यास मदत होते. त्यामुळे पुढच्या वेळी पिझ्झा खाताना ओरेगॅनो केवळ चवीसाठी नाही, तर आरोग्यासाठी किती महत्त्वाचा आहे, हे नक्की लक्षात ठेवा!