माधुरीने व्हिडिओमध्ये आपल्या संघर्षाची आणि वेदनेची कहाणी मांडताना सांगितले की, प्रेक्षकांच्या प्रेमामुळेच तिचे आजचे स्थान निर्माण झाले आहे, परंतु सध्या याच सोशल मीडियाचा वापर करून तिला लक्ष्य केले जात आहे. तिच्या सोशल मीडिया पोस्टखाली अत्यंत अपमानास्पद आणि घाणेरड्या कमेंट्स करून तिची बदनामी करण्याचे प्रकार सातत्याने सुरू आहेत. एवढेच नव्हे तर तिचे अधिकृत विकिपीडिया पेज काढून टाकण्यात आले असून काही फॅन पेजेस हॅक करून डिलीट करण्यात आली आहेत. तिच्या मोबाईल क्रमांकावर 'कॉल बॉम्बिंग'सारखे प्रकार केले जात असल्याने सतत फोन वाजत राहतात, ज्याचा थेट परिणाम तिच्या व्यावसायिक कामावर होत आहे. या सर्व प्रकारामुळे ती तीव्र मानसिक तणावाखाली असून, घराबाहेर पडताना कोण काय करेल किंवा बोलेल या भीतीने तिला सुरक्षेची चिंता सतावू लागली आहे.

याप्रकरणी तिने आधीच सायबर पोलिसांकडे अधिकृत तक्रार नोंदवली आहे, परंतु तरीही हा त्रास थांबलेला नाही. त्यामुळे तिने महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, राष्ट्रवादीच्या नेत्या सुनेत्रा पवार तसेच मनसे अध्यक्ष राज ठाकरे यांच्याकडे मदतीची कळकळीची विनंती केली आहे. यानंतर तिने मनसे चित्रपट सेनेच्या कार्यालयाला भेट देऊन राज ठाकरे यांना थेट पत्र दिले तसेच शालिनी ठाकरे आणि अमेय खोपकर यांची भेट घेतली. या संपूर्ण षडयंत्रामागे नेमके कोणाचे हात आहेत, याचा लवकरात लवकर छडा लावून योग्य तो तपास केला जाईल, असा विश्वास तिला या नेत्यांकडून मिळाला आहे.

आपली बाजू मांडताना माधुरी अतिशय भावूक झाली होती. ती म्हणाली की, एक महिला कलाकार म्हणून ही परिस्थिती अत्यंत भीतीदायक आणि मानसिकदृष्ट्या खचवून टाकणारी आहे. तिला कोणाचेही नुकसान करायचे नसून केवळ आपली प्रतिष्ठा, सत्य आणि सुरक्षितता टिकवून हत्येमागील खरा चेहरा समोर यावा, एवढीच तिची प्रामाणिक अपेक्षा आहे. कलाकारांच्या सुरक्षेचा आणि सायबर गुन्हेगारीचा हा मुद्दा आता राजकीय वर्तुळातही गाजण्याची चिन्हे आहेत.