- सुनील मेहरोत्रा
मुंबई : सध्या भोंदूबाबा अशोक खरात प्रकरणात अनेक धक्कादायक खुलासे तपासादरम्यान समोर आले आहेत. सोमवारी (4 मे) तपास यंत्रणेने महाराष्ट्र राज्य महिला आयोगाच्या माजी अध्यक्षा रूपाली चाकणकर यांच्या बहीण प्रतिभा चाकणकर यांची सखोल चौकशी केली.
हे प्रकरण नाशिकमधील एका सहकारी पतसंस्थेतील संशयास्पद बँक खात्यांशी संबंधित आहे. ईडीला संशय आहे की, ही खाती प्रत्यक्षात अशोक खरात चालवत होता. तसेच, त्याद्वारे मोठ्या प्रमाणात आर्थिक गैरव्यवहार करण्यात आला आहे.
तपासात असे उघड झाले आहे की, नाशिकमधील समता नागरी सहकारी पतसंस्थेत प्रतिभा चकणकर आणि त्यांच्या मुलाच्या नावावर अनेक खाती उघडण्यात आली होती. आश्चर्याची गोष्ट म्हणजे, या खात्यांच्या केवायसीमध्ये अशोक खरातचा मोबाईल नंबर देण्यात आला होता. त्यामुळे ईडीला खात्री आहे की, ही खाती प्रतिभा आणि त्यांच्या मुलाच्या नावावर असली तरी, खरातचेच त्यावर पूर्ण नियंत्रण होते. या पार्श्वभूमीवर प्रतिभा चाकणकर यांचा जबाब मनी लाँडरिंग कायद्यांतर्गत नोंदवण्यात आला. आता त्यांच्या मुलालाही चौकशीसाठी बोलावण्यात आले आहे. या खात्यांमध्ये जमा झालेल्या मोठ्या रकमेचा स्रोत काय? हे समजून घ्यायचे आहे.
अशोक खरातवर बलात्कार, खंडणी आणि अंधश्रद्धा पसरवणे यासह आधीच अनेक गंभीर आरोप आहेत. तसेच आता मनी लाँडरिंग प्रकरणातमध्येही चौकशी करण्यात येत आहे. ईडी खरातच्या सांगण्यावरून चालवल्या जाणाऱ्या 60 संशयास्पद खात्यांची चौकशी करत आहे. खरातचा जवळचा सहकारी असलेल्या ए. पी. बावके यांचे नावही चर्चेत आहे. असा आरोप आहे की, जेव्हा या खात्यांमध्ये रोख रक्कम जमा केली जात होती, तेव्हा बावके तिथे उपस्थित होते. सध्या तुरुंगात असलेल्या बावके यांचा जबाबही नोंदवण्यात आला आहे. आपण फक्त खरातच्या आदेशांचे पालन करत होतो, असे सांगून त्यांनी निर्दोष असल्याचा दावा केला असला तरी, गुन्ह्यातून किती पैसे कमावले गेले? हे निश्चित करण्यासाठी ईडी आता तपशील एकत्र करत आहे.
स्वतःला गॉडमॅन म्हणवणाऱ्या अशोक खरातला मार्च महिन्यात नाशिकमध्ये अटक करण्यात आली होती. यानंतर, ईडीने गुन्हा दाखल करून एप्रिलमध्ये तपास सुरू केला. एप्रिलमध्ये नाशिक, पुणे आणि इतर अनेक शहरांमधील खरातच्या ठिकाणांवर छापे टाकण्यात आले, परिणामी बँकेतील 4 कोटी रुपये रोख रक्कम गोठवण्यात आली आणि कोट्यवधी रुपयांच्या 90 मालमत्तांशी संबंधित कागदपत्रे जप्त करण्यात आली.