मुंबई : महाराष्ट्र पोलीस भरतीची परीक्षा पुन्हा एकदा चर्चेचा विषय ठरली आहे. राज्यातील अनेक तरुण वर्षभर प्रयत्न करून या परीक्षेची तयारी करतात. पण, अशा मेहनती मुलांच्या स्वप्नावर गदा आणली जात असल्याची तक्रार आता केली जात आहे.

याचे कारण, नुकताच एक व्हिडीओ समोर आला ज्यामध्ये एसआरपीएफ गट 5 येथील पोलीस भरती परीक्षेत चक्क एका खासगी प्रकाशनाच्या सराव संचातून 100 पैकी 85 प्रश्न जसेच्या तसे विचारण्यात आल्याचा धक्कादायक प्रकार उघडकीस आला आहे. खासदार सुप्रिया सुळे आणि विजय वडेट्टीवार यांनी या प्रकरणाच्या सखोल चौकशीची मागणी करत सरकारवर जोरदार टीका केली आहे.

राज्य राखीव पोलीस दलाच्या भरती प्रक्रियेला पुन्हा गालबोट लागल्याचे समोर आले आहे. शनिवारी (2 मे) एसआरपीएस गटाची 100 गुणांची लेखी परीक्षा पार पडली. ही परीक्षा इंदापुरातील एका महाविद्यालयात झाली. प्रत्येक प्रश्नाला एक गुण होता, असे एकूण 100 प्रश्न परीक्षेत विचारण्यात आले होते. त्याच शंभर प्रश्नांची क्रमवारी मागे-पुढे करून ए, बी, सी आणि डी असे प्रश्नसंच पुरविण्यात आले होते. या परीक्षेतील चारही प्रश्नपत्रिकेत 85 प्रश्न एका खासगी प्रकाशनाच्या सराव संचातून उचलण्यात आले होते. या प्रकरणामुळे राज्यात खळबळ उडाली असून राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी राज्य सरकारवर टीका केली आहे.