त्यानुसार पुण्यात मुसळधार पाऊस कोसळताना दिसत आहे. पुणे शहरासह उपनगरात आज (02 एप्रिल) दुपारी पुन्हा एकदा जोरदार पावसाने हजेरी लावली. गेल्या चार दिवसांपासून पावसाचे वातावरण असल्यामुळे पुणेकराना आता पावसाळा सुरू झाल्यासारखे वाटू लागले आहे.

पुणे शहरासह जिल्ह्यात मंगळवारी आकाश दिवसभर ढगाळ होते, पण पावसाने विश्रांती घेतली होती. तसेच बुधवारी देखील सकाळपासूनच ढगाळ वातावरण होते. त्यामुळे उकाड्यात वाढ झाली होती. मात्र दुपारनंतर तीनच्या सुमारास वारा सुटला आणि उपनगरांमध्ये हलक्या सरी पडल्या. तर आज दुपारपर्यंत उकाडा जाणवत होता. मात्र अचानक दुपारी तीनच्या सुमारास जोरदार पावसाला सुरुवात झाली. कात्रज-सातारा रस्त्यावर गारा पडत असताना कोथरूड, कर्वेनगर-कर्वे रस्त्यावर ऊन पडले होते. मात्र तासाभरानंतर तिथेही पावसाला सुरुवात झाली. तर डेक्कन-शिवाजीनगर पावसाच्या हलक्या सरी बरसल्या. त्यामुळे वातावरणातील बदलामुळे हवेत गारवा वाढला होता. काल रात्री साडेआठपर्यंत शहरात 0.4 मिलिमीटर, तर लोहगावमध्ये 32.6 मिलिमीटर पाऊस पडला. त्यानंतर आज पावसाला सुरुवात झाल्यानंतर अनेकांनी पावसात भिजण्यापेक्षा रस्त्याच्या कडेला आणि आडोशामध्ये थांबणे पसंत केले. मात्र या हंगामात एकाच आठवड्यात दुसऱ्यांदा गारांसह पावसाची नोंद झाली, हे विशेष.