भारतीय रेल्वेने दररोज लाखो प्रवासी प्रवास करतात. मात्र प्रवासाची योजना करताना सर्वात मोठी चिंता असते ती म्हणजे तिकीट कन्फर्म होईल की नाही. विशेषतः सणासुदीच्या दिवसांत किंवा सुट्ट्यांच्या काळात रेल्वे तिकीट मिळवणे मोठे आव्हान बनते.

अनेकजण घाईघाईत तिकीट बुक करतात आणि नंतर वेटिंग लिस्ट पाहून चिंतेत पडतात.

पण तुम्हाला माहित आहे का, प्रत्येक वेटिंग लिस्टची कन्फर्म होण्याची शक्यता सारखी नसते? रेल्वेच्या GNWL, RLWL, PQWL, RAC आणि TQWL अशा वेगवेगळ्या श्रेणी असतात आणि प्रत्येकाचे नियम व प्राधान्यक्रम वेगळे असतात. जर तुम्हाला याची योग्य माहिती असेल, तर कन्फर्म तिकीट मिळण्याची शक्यता मोठ्या प्रमाणात वाढू शकते.

GNWL तिकीट
GNWL म्हणजे जनरल वेटिंग लिस्ट ही वेटिंग लिस्ट ट्रेनच्या सुरुवातीच्या स्थानकापासून अंतिम स्थानकापर्यंत प्रवास करणाऱ्या प्रवाशांसाठी असते. रेल्वेकडून या तिकिटांना सर्वाधिक प्राधान्य दिले जाते. त्यामुळे GNWL तिकीट कन्फर्म होण्याची शक्यता सर्वाधिक असते. साधारणपणे 80 ते 90 टक्के तिकिटे कन्फर्म होऊ शकतात. जर तुम्हाला कन्फर्म तिकीट हवे असेल, तर शक्यतो GNWL श्रेणीतील तिकीट बुक करण्याचा प्रयत्न करावा.

RLWL तिकीट
RLWL म्हणजे रिमोट लोकेशन वेटिंग लिस्ट ही वेटिंग लिस्ट मधल्या स्थानकांवरून प्रवास करणाऱ्या प्रवाशांसाठी असते. या तिकिटांचे कन्फर्मेशन GNWL पेक्षा कमी असले तरी काही प्रमाणात चांगली शक्यता असते. साधारण 40 ते 60 टक्के तिकिटे कन्फर्म होऊ शकतात.

PQWL तिकीट
PQWL म्हणजे पूल्ड कोटा वेटिंग लिस्ट ही वेटिंग लिस्ट प्रामुख्याने कमी अंतराच्या प्रवाशांसाठी असते. या श्रेणीतील तिकीट कन्फर्म होण्याची शक्यता खूपच कमी असते. अनेकदा प्रवाशांना शेवटपर्यंत प्रतीक्षा करावी लागते. याचे कन्फर्मेशन प्रमाण साधारण 20 ते 30 टक्के असते.

RSWL तिकीट
RSWL म्हणजे रोड साइड वेटिंग लिस्ट ही यादी ट्रेनच्या मूळ स्थानकाजवळील काही स्टेशनसाठी असते. या श्रेणीतील तिकिटे फार कमी प्रमाणात कन्फर्म होतात. त्यामुळे अशा तिकिटांमध्ये कन्फर्मेशनचे कमी संधी असते. याची शक्यता साधारण 10 ते 20 टक्के असते.

TQWL तिकीट
TQWL म्हणजे तत्काळ वेटिंग लिस्ट ही तिकिटे शेवटच्या क्षणी बुक केली जातात. तत्काळ तिकिटांमध्ये वेटिंग असल्यास कन्फर्म होण्याची शक्यता अत्यंत कमी असते. अनेकदा ही तिकिटे कन्फर्म होत नाहीत. त्यामुळे शक्यतो तत्काळ वेटिंग टाळणे चांगले.

RAC तिकीट
RAC म्हणजे रिजर्व्हेशन अगेन्स्ट कॅन्सलेशन या तिकिटात पूर्ण सीट मिळत नाही, पण प्रवासाची संधी निश्चित मिळते. सुरुवातीला सीट शेअर करावी लागू शकते. मात्र प्रवासापूर्वी किंवा प्रवासादरम्यान पूर्ण सीट मिळण्याची शक्यता वाढते. त्यामुळे RAC तिकीट हे वेटिंगपेक्षा अधिक सुरक्षित मानले जाते.