उन्हाळा सुरू झाला की शरीरासोबत पोटाच्याही तक्रारी वाढू लागतात. बाहेरचे तापमान वाढले की अनेकांना जेवल्यानंतर पोटात जळजळ होणे, अॅसिडिटी, पोट फुगणे किंवा जडपणा जाणवू लागतो. सुरुवातीला साधी समस्या वाटणाऱ्या या गोष्टी पुढे गंभीर पचनाच्या त्रासात बदलू शकतात.

त्यामुळे वेळेवर काळजी घेणे खूप महत्त्वाचे ठरते.

उन्हाळ्यात पोट का बिघडते?
कडक उन्हामुळे शरीरातील पाण्याचे प्रमाण कमी होते. त्याचा थेट परिणाम पचनसंस्थेवर होतो. शरीरात उष्णता वाढली की अन्न व्यवस्थित पचत नाही आणि अॅसिडिटी, ब्लोटिंग, अपचन अशा समस्या सुरू होतात. आयुर्वेदानुसार याला 'पित्त दोष' वाढणे असे म्हटले जाते. तिखट, तेलकट पदार्थ, अनियमित जेवण आणि कमी पाणी पिण्यामुळे ही समस्या अधिक वाढते.

डिहायड्रेशनमुळे उष्णता वाढ
दिवसभर उन्हात फिरणे, कमी पाणी पिणे किंवा सतत घाम येणे यामुळे शरीर डिहायड्रेट होते. शरीरात पुरेसे पाणी नसल्याने पचनक्रिया मंदावते आणि पोटात जळजळ होऊ लागते. त्यामुळे उन्हाळ्यात फक्त तहान लागली की पाणी पिण्याऐवजी नियमित अंतराने पाणी पिणे आवश्यक आहे.

जास्त खाणं धोक्याचं
उन्हाळ्यात पोटाची पचनक्षमता कमी झालेली असते. अशावेळी जास्त प्रमाणात जेवण केल्यास पचनसंस्थेवर अतिरिक्त ताण येतो. त्यामुळे अन्न नीट पचत नाही आणि पोट गरम होऊ लागते. थोडं कमी पण हलकं अन्न खाणं या दिवसांत अधिक फायदेशीर ठरतं.

बाहेरचे आणि शिळे अन्न टाळा
उन्हाळ्यात बॅक्टेरिया खूप वेगाने वाढतात. त्यामुळे शिळे अन्न, दूषित स्ट्रीट फूड किंवा खूप वेळ बाहेर ठेवलेले पदार्थ खाल्ल्यास पोटात इन्फेक्शन होण्याचा धोका वाढतो. त्यामुळे शक्यतो ताजे आणि घरचे अन्नच खावे.

पोट थंड ठेवण्यासाठी काय प्यावे?

पोटाला आराम देणारे हेल्दी ड्रिंक्स:
- नारळ पाणी
- ताक
- सौंफ आणि धण्याचे पाणी
- पुदिन्याचे पाणी
- सत्तूचे सरबत
- चिया सीड्स भिजवून तयार केलेले ड्रिंक
- गोंदाचे पाणी
हे पदार्थ शरीराला थंडावा देतात आणि पचनसंस्था मजबूत ठेवण्यास मदत करतात.