पुणे शहर पोलीस आयुक्तालयाच्या परिमंडळ-२ अंतर्गत तब्बल ७०१ रेकॉर्डवरील गुन्हेगारांविरोधात भारतीय नागरिक सुरक्षा संहिता (BNSS) कलम १६३(२) अन्वये प्रतिबंधात्मक आदेश जारी करण्यात आले आहेत.

ही कारवाई १४ सप्टेंबर ते २६ सप्टेंबर २०२६ या कालावधीसाठी करण्यात आली असून संबंधित व्यक्तींना पोलीस ठाण्यांच्या कार्यक्षेत्रात प्रवेश करणे, वास्तव्य करणे, सार्वजनिक कार्यक्रमांमध्ये सहभागी होणे, मिरवणुकांमध्ये भाग घेणे तसेच सार्वजनिक शांतता आणि कायदा-सुव्यवस्थेला बाधा निर्माण होईल असे कोणतेही कृत्य करण्यास मनाई करण्यात आली आहे.

सात पोलीस ठाण्यांतील ७०१ जणांवर कारवाई

परिमंडळ-२ मधील पोलीस ठाण्यांच्या अभिलेखावरील व्यक्तींवर करण्यात आलेल्या कारवाईचा तपशील असा आहे—

• स्वारगेट पोलीस ठाणे — १००
• सहकारनगर पोलीस ठाणे — १०१
• पर्वती पोलीस ठाणे — ११५
• मार्केटयार्ड पोलीस ठाणे — ७६
• बिबवेवाडी पोलीस ठाणे — १०४
• भारती विद्यापीठ पोलीस ठाणे — १०४
• आंबेगाव पोलीस ठाणे — १०१

अशा प्रकारे एकूण ७०१ रेकॉर्डवरील गुन्हेगारांविरोधात प्रतिबंधात्मक कारवाई करण्यात आली आहे.

गंभीर गुन्ह्यांची पार्श्वभूमी असणाऱ्यांवर नजर

पोलिसांनी दिलेल्या माहितीनुसार, या यादीमध्ये बेकायदेशीर शस्त्रांचा वापर, मारहाण, गंभीर दुखापत, धमकी, घरात बेकायदेशीर प्रवेश, मालमत्तेचे नुकसान, चोरी, दंगा, हल्ला, दरोड्याची तयारी, दहशत निर्माण करणे, जबरी चोरी, बलात्कार, जातीयवाचक भाष्य, खुनाचा प्रयत्न आणि बेकायदेशीर अतिक्रमण यांसारख्या गुन्ह्यांची पार्श्वभूमी असलेल्या व्यक्तींचा समावेश आहे.

गणेशोत्सवाच्या काळात मोठ्या प्रमाणावर नागरिक रस्त्यावर येतात, मिरवणुका आणि सार्वजनिक कार्यक्रमांचे आयोजन केले जाते. त्यामुळे पूर्वी गंभीर स्वरूपाच्या गुन्ह्यांमध्ये सहभागी असलेल्या व्यक्तींमुळे कायदा-सुव्यवस्थेचा प्रश्न निर्माण होऊ नये, यासाठी पोलिसांनी आगाऊ उपाययोजना केली आहे.

मिरवणुकांमध्ये सहभागी होण्यासही मनाई

संबंधित ७०१ व्यक्तींना सार्वजनिक कार्यक्रमांमध्ये भाग घेणे, मिरवणुकांमध्ये सहभागी होणे, सार्वजनिक ठिकाणी अशा प्रकारे वावरणे की ज्यामुळे शांततेला बाधा निर्माण होईल, यावर सक्त मनाई करण्यात आली आहे.

प्रतिबंधात्मक आदेशांचे उल्लंघन झाल्यास संबंधितांविरोधात पुढील कठोर कायदेशीर कारवाई करण्यात येणार असल्याचेही पोलिसांनी स्पष्ट केले आहे.

ही कारवाई पुणे शहर पोलीस आयुक्त अमितेश कुमार, सह पोलीस आयुक्त संजय दराडे आणि अपर पोलीस आयुक्त राजेश बनसोडे यांच्या मार्गदर्शनाखाली करण्यात आली आहे. परिमंडळ-२ चे पोलीस उपायुक्त मिलिंद मोहिते यांच्या स्तरावर ही प्रतिबंधात्मक मोहीम राबवण्यात आली आहे.