गेल्यावर्षी याच दिवशी धरणसाखळीत २५.७४ टीएमसी म्हणजे ८८.२९ टक्के साठा होता. त्यामुळे यंदा गेल्यावर्षीपेक्षा १.७९ टीएमसी पाणीसाठा अधिक असून, टक्केवारीतही ६.१७ टक्क्यांची वाढ झाली आहे.

खडकवासला धरण पूर्ण क्षमतेने भरले असून, धरणात १.९७ टीएमसी म्हणजे १०० टक्के पाणीसाठा आहे. पानशेत धरणही ९८.०९ टक्के भरले असून, त्यामध्ये १०.४४ टीएमसी पाणी आहे. वरसगाव धरणात १२.०७ टीएमसी म्हणजे ९४.१६ टक्के, तर टेमघर धरणात ३.०४ टीएमसी म्हणजे ८२.१० टक्के पाणीसाठा नोंदविण्यात आला आहे.

चारही धरणांमध्ये सायंकाळी पाच वाजेपर्यंत एकूण २८६ दशलक्ष घनफूट पाण्याची आवक सुरू होती. खडकवासला धरणात २०० दशलक्ष घनफूट, वरसगाव धरणात ८६ दशलक्ष घनफूट आणि टेमघर धरणात १६ दशलक्ष घनफूट आवक नोंदविण्यात आली.

खडकवासल्यातून विसर्ग वाढवला

धरणाच्या पाणीपातळीत झपाट्याने वाढ होत असून, पाणलोट क्षेत्रात सुरू असलेल्या पावसामुळे खडकवासला धरणाच्या सांडव्यावरील विसर्ग वाढविण्याचा निर्णय पाटबंधारे विभागाने घेतला आहे. सायंकाळी साडेसात वाजता मुठा नदीपात्रातील विसर्ग ४,७०८ क्युसेकवरून ५,७८३ क्युसेक करण्यात येणार असल्याचे विभागाने स्पष्ट केले. म्हणजेच विसर्गात १,०७५ क्युसेकची वाढ करण्यात आली आहे.

पावसाचे प्रमाण आणि धरणातील पाण्याची आवक लक्षात घेऊन विसर्ग पुन्हा कमी किंवा अधिक केला जाऊ शकतो. खडकवासला धरणातून सांडव्यावरून आतापर्यंत एकूण ३.६९ टीएमसी पाणी सोडण्यात आले आहे.

नदीकाठच्या नागरिकांना सतर्कतेचा इशारा

मुठा नदीपात्रात कोणीही उतरू नये, नदीपात्रातील जनावरे, वाहने किंवा इतर साहित्य तातडीने सुरक्षित ठिकाणी हलवावे, असे आवाहन खडकवासला पाटबंधारे विभागाने केले आहे. नदीकाठच्या तसेच सखल भागातील नागरिकांना स्थानिक प्रशासनाने तातडीने सूचना देऊन आवश्यक खबरदारी घेण्यास सांगण्यात आले आहे.

धरणनिहाय पाणीसाठा

खडकवासला : १.९७ टीएमसी — १०० टक्के
पानशेत : १०.४४ टीएमसी — ९८.०९ टक्के
वरसगाव : १२.०७ टीएमसी — ९४.१६ टक्के
टेमघर : ३.०४ टीएमसी — ८२.१० टक्के

एकूण साठा : २७.५३ टीएमसी — ९४.४६ टक्के
गतवर्षीचा साठा : २५.७४ टीएमसी — ८८.२९ टक्के