अशावेळी अनेकजण बाजारात मिळणाऱ्या केमिकल स्प्रेचा वापर करतात. मात्र अभिनेत्री आणि लेखिका ट्विंकल खन्ना किचनमधील या समस्येसाठी एक साधा घरगुती उपाय वापरते.

अक्षय कुमारची पत्नी ट्विंकल खन्नाने सांगितलेल्या या उपायासाठी फारसं काही वेगळं साहित्य लागत नाही. आपल्या किचनमध्ये सहज सापडणारी लवंग आणि तमालपत्र यांचा वापर करून एक नैसर्गिक स्प्रे तयार करता येतो. त्यात पांढऱ्या व्हिनेगरचा वापर केल्याने किचनमधील पृष्ठभाग स्वच्छ करण्यासही मदत होते.

या उपायासाठी काय साहित्य लागेल?

• लवंगा- ८ ते १०

• तमालपत्रं - २ ते ३

• पाणी - एक कप

• पांढरं व्हिनेगर - एक कप

स्प्रे कसा तयार करायचा?

सर्वप्रथम लवंग आणि तमालपत्र थोडं कुटून घ्या. त्यामुळे त्यांचा सुगंध अधिक तीव्र होतो.

यानंतर एका भांड्यात एक कप पाणी आणि एक कप पांढरं व्हिनेगर घ्या. त्यामध्ये कुटलेली लवंग आणि तमालपत्र टाकून मिश्रण काही वेळ उकळा.

मिश्रण व्यवस्थित उकळल्यानंतर गॅस बंद करा आणि पूर्णपणे थंड होऊ द्या. त्यानंतर ते गाळून एका स्वच्छ स्प्रे बाटलीत भरून ठेवा.

झुरळं आणि मुंग्यांना दूर ठेवण्यासाठी कसा होतो उपयोग?

लवंग आणि तमालपत्राला तीव्र नैसर्गिक सुगंध असतो. काही कीटकांना अशा प्रकारचा वास आवडत नसल्याने ते त्या भागापासून दूर राहण्यास मदत होऊ शकते.

व्हिनेगरचा वापर पृष्ठभाग स्वच्छ करण्यासाठी केला जातो. मुंग्या अनेकदा वासाच्या खुणांचा मागोवा घेत एकाच मार्गाने ये-जा करतात. अशा जागा स्वच्छ केल्याने त्यांचा नेहमीचा मार्ग विस्कळीत होण्यास मदत होऊ शकते.

हा स्प्रे कुठे वापरायचा?

रात्री किचनमधील काम आटोपल्यानंतर कॅबिनेट आणि ड्रॉवरच्या कोपऱ्यांत, सिंकच्या आसपास, किचन ओट्याच्या कडेला किंवा ज्या ठिकाणी मुंग्या आणि झुरळं वारंवार दिसतात तिथे हा स्प्रे करता येतो. मात्र हा स्प्रे थेट अन्नपदार्थांवर वापरू नये. तसेच व्हिनेगरमुळे काही प्रकारच्या मार्बल किंवा नैसर्गिक दगडी पृष्ठभागाचं नुकसान होऊ शकतं. त्यामुळे वापरण्यापूर्वी पृष्ठभागासाठी तो योग्य आहे की नाही हे तपासणं महत्त्वाचं आहे.

फक्त स्प्रे पुरेसा नाही

हा घरगुती उपाय झुरळं आणि मुंग्या दूर ठेवण्यासाठी उपयोगी ठरू शकतो. मात्र किचनमध्ये मोठ्या प्रमाणात कीटकांचा प्रादुर्भाव असेल तर केवळ अशा उपायावर अवलंबून राहणं योग्य ठरणार नाही.

किचनमध्ये अन्नाचे कण पडू न देणं, कचरा नियमित बाहेर टाकणं, सिंक आणि ओटा कोरडा ठेवणं तसेच भिंतीतील किंवा कपाटातील फटी बंद करणंही आवश्यक आहे. समस्या गंभीर असल्यास पेस्ट कंट्रोलची मदत घेणं अधिक परिणामकारक ठरू शकतं.