मुंबई : गोरेगाव-मुलुंड जोड रस्ता (जीएमएलआर) प्रकल्पाच्या टप्पा ३ (ब) अंतर्गत संजय गांधी राष्ट्रीय उद्यानाखाली बांधण्यात येणाऱ्या दुहेरी बोगद्यांच्या कामाला वेग आला आहे. गोरेगाव पूर्व येथील दादासाहेब फाळके चित्रनगरी ते मुलुंड पश्चिम येथील अमर नगरदरम्यान 'तुळशी' या टनेल बोरिंग मशीनच्या (टीबीएम) माध्यमातून प्रत्येकी तीन मार्गिकांचे दोन बोगदे बांधण्यात येत आहेत.

संजय गांधी राष्ट्रीय उद्यानाखालील बोगदा खणनाचे काम अत्यंत तांत्रिक आणि आव्हानात्मक असल्याने सुरक्षा नियमांची काटेकोर अंमलबजावणी करण्यावर बांगर यांनी विशेष भर दिला. प्रकल्पातील प्रत्येक टप्प्यावर सुरक्षितता आणि गुणवत्ता कायम राखण्याच्या सूचना त्यांनी संबंधित अधिकाऱ्यांना दिल्या. यावेळी प्रमुख अभियंता (पूल) राजेश मुळे यांच्यासह संबंधित अधिकारी आणि प्रकल्प सल्लागार उपस्थित होते.

दुसऱ्या टीबीएमची तयारी अंतिम टप्प्यात!

दुसऱ्या बोगदा खणन संयंत्राच्या सुटे भागांची जुळवाजुळव करण्याचे काम ७० टक्के पूर्ण झाले आहे. हे काम ३० सप्टेंबर २०२६ पर्यंत पूर्ण करण्याचे निर्देश बांगर यांनी दिले. संपूर्ण यंत्रणा प्रकल्पस्थळी स्थापित झाल्यानंतर तिची कार्यक्षमता, सुरक्षितता आणि सर्व प्रणालींचे एकत्रित कार्य तपासण्यासाठी १ ऑक्टोबर २०२६ पासून साइट अॅक्सेप्टन्स टेस्ट सुरू करण्याचे निर्देशही त्यांनी दिले. हे काम पूर्ण झाल्यानंतर दुसऱ्या टीबीएमद्वारे प्रत्यक्ष बोगदा खणन प्रक्रियेचे नियोजन करण्यात येणार आहे.

(संबधित इंग्रजी बातमी वाचण्यासाठी येथे क्लिक करा.)