मुंबई आणि उपनगरांमध्ये रविवारीही (दि. ०५) मुसळधार पावसाचा जोर कायम राहिला. सततच्या पावसामुळे शहरातील अनेक भागांत पाणी साचले असून वाहतुकीवर मोठा परिणाम झाला आहे. भारतीय हवामान विभागाने (आयएमडी) मुंबईसह ठाणे, पालघर, रायगड आणि आसपासच्या जिल्ह्यांसाठी रेड अलर्ट कायम ठेवत अतिमुसळधार पावसाचा इशारा दिला आहे.

दरम्यान, सांताक्रूझ महामार्गावरही जोरदार पावसासह वाऱ्याचा वेग वाढला होता. प्रतिकूल हवामान असूनही या मार्गावरील वाहतूक बहुतांश सुरळीत सुरू असल्याचे दिसून आले.

कुर्ला टर्मिनस परिसरात पाणी साचले

कुर्ला टर्मिनस परिसरात मोठ्या प्रमाणात पाणी साचल्याचे व्हिडीओ सोशल मीडियावर व्हायरल झाले आहेत. रस्ते जलमय झाल्यामुळे वाहनचालकांना मोठ्या अडचणींचा सामना करावा लागला. या परिसरातील पाणी साचल्याने वाहतुकीवर परिणाम झाला असून नागरिकांमध्ये सुरक्षेची चिंता व्यक्त केली जात आहे.

नालासोपाऱ्यातही पूरस्थिती

नालासोपाऱ्यातील सेंट्रल पार्क, तुळिंज पूल आणि अलायन्स हॉस्पिटल रोड परिसरातही मोठ्या प्रमाणात पाणी साचल्याने वाहतुकीवर परिणाम झाला. पावसाचे पाणी उपसण्यासाठी महापालिकेकडून विविध ठिकाणी ड्रेनेज पंप कार्यान्वित करण्यात आले.

रेड अलर्ट कायम; नागरिकांना सतर्कतेचे आवाहन

आयएमडीने मुंबई, ठाणे, पालघर, रायगडसह आसपासच्या जिल्ह्यांसाठी रेड अलर्ट कायम ठेवला आहे. काही ठिकाणी ताशी ५० ते ६० किलोमीटर वेगाने वारे वाहण्याची शक्यता व्यक्त करण्यात आली आहे. त्यामुळे नागरिकांनी अत्यावश्यक कामाशिवाय घराबाहेर पडू नये, असे आवाहन प्रशासनाने केले आहे.

दरम्यान, सततच्या पावसामुळे दादर, चर्चगेट, ठाणे आदी भागांत झाडे कोसळण्याच्या घटनांमध्ये वाढ झाली आहे. तसेच भांडुप (पश्चिम) येथील एलबीएस मार्गावर सुरू असलेल्या उत्खननादरम्यान रस्त्याचा सुमारे १०० बाय १०० फूट भाग खचल्याची घटना घडली. या दुर्घटनेत कोणतीही जीवितहानी झाली नाही. मात्र, घटनास्थळी उभा असलेला एक टेम्पो खचलेल्या भागात पडला.

(इंग्रजी बातमी वाचण्यासाठी येथे क्लिक करा.)