नान, पराठा किंवा गरमागरम भातासोबत हा पदार्थ खाण्याची मजाच वेगळी असते. अगदी हॉटेलसारखा प्रॉन टिक्का मसाला तुम्हीही घरच्या घरी सहज तयार करू शकता.

साहित्य :

प्रॉन्स मॅरिनेट करण्यासाठी

• २० ते २५ जम्बो प्रॉन्स (स्वच्छ करून शीर काढलेले)

• अर्ध्या लिंबाचा रस

• १ टीस्पून मीठ

• १ टीस्पून लाल तिखट

• १ टीस्पून आलं-लसूण पेस्ट

ग्रेव्हीसाठी

• २ बारीक चिरलेले कांदे

• ३ टोमॅटो प्युरी

• १/२ कप दही

• १/४ कप फ्रेश क्रीम

• १ टीस्पून जिरे

• १ टीस्पून हळद

• १ टेबलस्पून काश्मिरी लाल तिखट

• १ टीस्पून मीठ (चवीनुसार)

• १ टेबलस्पून गरम मसाला

• १ टीस्पून आलं-लसूण पेस्ट

• १ टेबलस्पून बटर

• २ टेबलस्पून तेल

• १ टीस्पून तंदुरी मसाला (ऐच्छिक)

कृती :

एका भांड्यात लिंबाचा रस, मीठ, लाल तिखट आणि आलं-लसूण पेस्ट एकत्र करून त्यात प्रॉन्स घाला. सर्व मसाला व्यवस्थित लागेल असे हलवून १५ ते २० मिनिटे मुरत ठेवा. कढईत बटर गरम करून मुरवलेले प्रॉन्स ४ ते ५ मिनिटे शिजवा. प्रॉन्स शिजल्यानंतर ते वेगळे काढून ठेवा.

त्याच कढईत तेल गरम करून जिरे तडतडू द्या. त्यानंतर चिरलेला कांदा घालून गडद सोनेरी रंग येईपर्यंत परता. कांदा परतल्यानंतर आलं-लसूण पेस्ट, काश्मिरी लाल तिखट, हळद आणि मीठ घालून एक मिनिट परता.

आता टोमॅटोची प्युरी घालून ३ ते ४ मिनिटे मंद आचेवर शिजवा. मिश्रण घट्ट होऊ लागल्यावर त्यात दही, फ्रेश क्रीम आणि गरम मसाला मिसळा. शिजवलेले प्रॉन्स ग्रेव्हीत घाला. इच्छेनुसार तंदुरी मसाला घालून २ ते ३ मिनिटे मंद आचेवर शिजवा. गरमागरम प्रॉन टिक्का मसाला बटर नान, तंदुरी रोटी, जिरा राईस किंवा साध्या भातासोबत सर्व्ह करा.

टिप्स :

• प्रॉन्स जास्त वेळ शिजवू नका, अन्यथा ते कडक होतात.

• काश्मिरी लाल तिखट वापरल्यास ग्रेव्हीला आकर्षक लाल रंग येतो.

• दही घालण्यापूर्वी गॅस मंद ठेवा, त्यामुळे दही फाटत नाही.

• अधिक रिच चव हवी असल्यास शेवटी थोडे बटर आणि क्रीम घाला.

• प्रॉन्स ताजे वापरल्यास पदार्थाची चव अधिक खुलते.

• ग्रेव्ही अधिक स्मूथ हवी असल्यास टोमॅटोची प्युरी गाळून वापरा.