मदुराई : निवृत्तीनंतरचे आयुष्य अनेकजण स्वतःच्या छंदांत किंवा आरामात घालवतात, मात्र तमिळनाडूतील मदुराई येथील ७६ वर्षांच्या निवृत्त पोलीस अधिकारी मालथी यांनी समाजसेवेचा एक आगळावेगळा मार्ग निवडला आहे.

तिरुपरनकुंड्रम मुरुगन मंदिर आणि आसपासच्या परिसरात माकडांची मोठी संख्या पाहून त्यांना मदतीची गरज असल्याचे मालथी यांच्या लक्षात आले. त्या आठवणी सांगताना म्हणाल्या, "ही माकडे डोंगराळ आणि जंगल भागात राहतात, त्यांना अन्नासाठी दररोज संघर्ष करावा लागतो. २०१५ मध्ये हे पाहून मी त्यांना मदत करण्याचा निर्णय घेतला." सुरुवातीला त्या दररोज जात असत, मात्र आता वयोमानामुळे आणि प्रकृतीच्या तक्रारींमुळे त्या दर शनिवारी न चुकता ही सेवा बजावतात. "या सेवेतून मिळते मानसिक समाधान" आपल्या या कार्याबद्दल बोलताना त्या म्हणतात, या प्राण्यांची सेवा केल्याने मला प्रचंड आनंद आणि मानसिक समाधान मिळते.

३५० माकडे होतात जमा

मालथी तिरुपरनकुंड्रम परिसरातील सहा ठिकाणांना भेट देतात, ज्यामध्ये मंदिर परिसर, सरवण पोईगाई, पालचुनाईकंडा सुब्रमण्यम मंदिर, मयूर वन आणि किल्ला परिसराचा समावेश आहे. शनिवारी दुपारी ३:३० च्या सुमारास मालथी यांनी हाक मारताच ३५० ते ४०० माकडे तिथे जमा होतात. त्या सांगतात की, काही ठिकाणी एकाच वेळी ५० माकडे येतात, तर गुहा मंदिर आणि मयूर वन परिसरात त्यांची संख्या २०० पेक्षा जास्त असते.