पुणे आणि पिंपरी-चिंचवड परिसरात खळबळ उडवून देणाऱ्या विषारी दारू विक्री प्रकरणाची गंभीर दखल घेत पुणे आणि पिंपरी-चिंचवडच्या पोलीस आयुक्तांनी मोठी कारवाई केली आहे. कर्तव्यात निष्काळजीपणा दाखवल्याबद्दल आणि पर्यवेक्षणाचा अभाव असल्याचा ठपका ठेवत एकूण 4 पोलीस अधिकारी आणि 4 पोलीस कर्मचाऱ्यांना तात्काळ निलंबित करण्यात आले आहे.

या धडक कारवाईमुळे पोलीस वर्तुळात प्रचंड खळबळ उडाली आहे.

हडपसर पोलीस ठाण्यातील 3 अधिकाऱ्यांवर निलंबनाची कारवाई

पुण्याचे पोलीस आयुक्त अमितेश कुमार यांनी या प्रकरणाची अत्यंत गंभीर दखल घेतली आहे. हडपसर पोलीस ठाण्याच्या हद्दीत घडलेल्या या प्रकारानंतर त्यांनी तीन बड्या अधिकाऱ्यांना घरचा रस्ता दाखवला आहे. निलंबित करण्यात आलेल्या अधिकाऱ्यांची नावे खालीलप्रमाणे आहेत.

• संजय मोगले (वरिष्ठ पोलीस निरीक्षक, हडपसर पोलीस स्टेशन, पुणे शहर)
• हसिना शिकलगार (सहाय्यक पोलीस निरीक्षक, हडपसर पोलीस चौकी, पुणे शहर)
• हसन मुलाणी (पोलीस उपनिरीक्षक, गुन्हे शोध पथक, हडपसर पोलीस स्टेशन, पुणे शहर)

या अधिकाऱ्यांच्या कार्यकाळात आणि हद्दीत अवैध व विषारी दारूची विक्री सुरू असताना त्यावर योग्य ती कारवाई न झाल्याने ही कारवाई करण्यात आली आहे.

(- VIDEO: "मी रील स्टार आहे, माझी गाडी का अडवली?", टोलमाफीसाठी क्रिएटरची चिंधीगिरी, कर्मचाऱ्यांशी हुज्जत)

पिंपरी-चिंचवडमधील दापोडी पोलीस चौकीतील 6 जण निलंबित

दुसरीकडे, पिंपरी-चिंचवडचे पोलीस आयुक्त विनयकुमार चौबे यांनीही अशाच प्रकारची कडक भूमिका घेत दापोडी पोलीस चौकीशी संबंधित 2 अधिकारी आणि 4 कर्मचाऱ्यांचे निलंबन केले आहे. यामध्ये खालील नावांचा समावेश आहे.

• विजय वाघमारे (वरिष्ठ पोलीस निरीक्षक, दापोडी पोलीस ठाणे)
• राजू भास्कर (फौजदार तथा तपास पथक प्रमुख)
• जयदीप सोनवणे (पोलीस कर्मचारी)
• नवनाथ पोटे (पोलीस कर्मचारी)
• सागर जाधव (पोलीस कर्मचारी)
• विशाल काळे (पोलीस कर्मचारी)

पोलीस दलाची प्रतिमा मलिन झाल्याने कारवाई