पुढील काही दिवसांत देशभरात पावसाची चाहूल

देशभरातील उकाड्याने हैराण झालेल्या नागरिकांसाठी दिलासादायक बातमी समोर आली आहे. नैऋत्य मोसमी वाऱ्यांनी अंदमान समुद्र आणि निकोबार बेटांमध्ये अधिकृत प्रवेश केला असून यंदाचा मान्सून वेगाने पुढे सरकत असल्याचे भारतीय हवामान विभागाने स्पष्ट केले आहे.

पुढील तीन ते चार दिवसांत मान्सून आणखी सक्रिय होण्याची शक्यता व्यक्त करण्यात आली असून केरळ किनारपट्टीवर तो अपेक्षेपेक्षा लवकर दाखल होण्याचे संकेत मिळत आहेत. त्यामुळे देशभरात पावसाची उत्सुकता आणखी वाढली आहे.

बंगालच्या उपसागरात आणि अरबी समुद्रात निर्माण झालेली अनुकूल हवामान प्रणाली मान्सूनसाठी पोषक ठरत आहे. अंदमान समुद्र परिसरात ढगांची घनता वाढली असून जोरदार वाऱ्यांसह पावसाच्या सरी कोसळत आहेत. हवामान विभागाच्या अंदाजानुसार, २६ मेच्या आसपास मान्सून केरळमध्ये दाखल होऊ शकतो. सामान्यतः १ जूनला केरळमध्ये मान्सून पोहोचतो, मात्र यंदा त्याची गती अधिक वेगवान दिसत आहे.

बुलेट ट्रेन प्रकल्पाच्या २१ किमी बोगद्यासाठी दुसऱ्या टीबीएमचा कटरहेड बसवला

भाजपमध्ये प्रवेशानंतर राघव चड्ढा यांच्यावर मोठी जबाबदारी

आरसीबीला धुळ चारली… तरी बंगळुरू थेट क्वालिफायरमध्ये!

देशातील अनेक राज्यांमध्ये गेल्या काही दिवसांपासून प्रचंड उष्णतेची लाट अनुभवायला मिळत आहे. महाराष्ट्र, राजस्थान, गुजरात आणि मध्य भारतातील तापमानाने चाळिशी पार केली असून नागरिकांना उन्हाच्या झळा सहन कराव्या लागत आहेत. अशा परिस्थितीत मान्सूनच्या आगमनाची बातमी दिलासा देणारी ठरत आहे. विशेषतः शेतकरी वर्गासाठी ही घडामोड अत्यंत महत्त्वाची मानली जात आहे. खरीप हंगामाची पेरणी, धरणांतील जलसाठा आणि पिण्याच्या पाण्याची उपलब्धता या सर्व गोष्टी मोठ्या प्रमाणावर मान्सूनवर अवलंबून असतात.

हवामान तज्ज्ञांच्या मते, मान्सूनचे लवकर आगमन हे सकारात्मक संकेत असले तरी संपूर्ण हंगामातील पावसाचे प्रमाण कसे राहील याकडेही लक्ष ठेवावे लागणार आहे. एल निनोच्या संभाव्य प्रभावामुळे काही भागांत पावसाचे वितरण असमान राहू शकते, अशी शक्यता व्यक्त केली जात आहे. तरीदेखील सध्या निर्माण झालेली परिस्थिती मान्सूनसाठी अनुकूल असल्याने यंदा चांगल्या पावसाची आशा व्यक्त होत आहे.