सक्तीतील भीषण दुर्घटनेत २० हून अधिक जणांचा मृत्यू
छत्तीसगडमधील वेदांता पॉवर प्लांटमध्ये झालेल्या भीषण स्फोटप्रकरणी आता मोठी कायदेशीर कारवाई सुरू झाली असून, कंपनीचे अध्यक्ष अनिल अग्रवाल यांच्यासह वरिष्ठ अधिकाऱ्यांवर गुन्हा दाखल करण्यात आला आहे.
१४ एप्रिल २०२६ रोजी सक्ती जिल्ह्यातील सिंघीतराई येथील प्लांटमध्ये झालेल्या या स्फोटात मृतांचा आकडा वाढत जाऊन सुमारे २० वर पोहोचला असून अनेक जण जखमी झाले आहेत.
या प्रकरणी स्थानिक पोलिसांनी प्लांट व्यवस्थापनातील ८ ते १० जणांविरुद्ध एफआयआर नोंदवला आहे. यात निष्काळजीपणामुळे मृत्यू, यंत्रसामग्री हाताळण्यात हलगर्जीपणा यांसारख्या गंभीर कलमांचा समावेश करण्यात आला आहे. प्राथमिक तपासात प्लांटमधील कामकाजात मोठ्या त्रुटी असल्याचे समोर आले आहे.
विप्रो हायड्रॉलिक्सकडून इटलीच्या इंडेको कंपनीचा ताबा
दक्षिणेत लोकसभा जागा सरासरीपेक्षा जास्त वाढणार
आयएसआय समर्थित दहशतवादी मॉड्यूलचा भंडाफोड; एक जण अटकेत
तपासादरम्यान समोर आलेल्या माहितीनुसार, बॉयलर-टर्बाइन प्रणालीतील उच्च दाबाच्या स्टीम ट्यूबमध्ये बिघाड झाल्यामुळे हा स्फोट झाला. अधिकाऱ्यांनी सांगितले की, स्फोट होण्यापूर्वी बॉयलरवरील लोड अचानक ३५० मेगावॅटवरून सुमारे ५९० मेगावॅटपर्यंत वाढवण्यात आला होता. या अचानक वाढलेल्या दाबामुळे यंत्रणा अस्थिर झाली आणि काही सेकंदांतच भीषण स्फोट झाला.
घटनेनंतर तातडीने बचावकार्य सुरू करण्यात आले. अनेक जखमींना जवळच्या रुग्णालयांमध्ये दाखल करण्यात आले असून काहींची प्रकृती गंभीर आहे. स्फोट इतका भीषण होता की अनेक कामगारांना गंभीर भाजल्या गेल्या. या घटनेमुळे परिसरात भीतीचे वातावरण निर्माण झाले आहे.
या दुर्घटनेनंतर राज्य सरकारनेही तातडीने चौकशीचे आदेश दिले आहेत. एका महिन्यात अहवाल सादर करण्यासाठी दंडाधिकारी चौकशी (magisterial inquiry) सुरू करण्यात आली आहे. याशिवाय तांत्रिक आणि फॉरेन्सिक तपासही सुरू आहे.
दरम्यान, या प्रकरणात वेदांता समूहाचे अध्यक्ष अनिल अग्रवाल आणि प्लांट प्रमुख देवेंद्र पटेल यांच्याविरोधातही गुन्हा दाखल करण्यात आला आहे. यामुळे या प्रकरणाला अधिक गंभीर वळण मिळाले आहे. तपासात निष्काळजीपणा सिद्ध झाल्यास संबंधितांवर कठोर कारवाई होण्याची शक्यता आहे.
ही दुर्घटना देशातील औद्योगिक सुरक्षेच्या मुद्द्यावर पुन्हा प्रश्नचिन्ह निर्माण करणारी ठरली आहे. कामगारांच्या सुरक्षिततेबाबत कंपन्यांनी अधिक जबाबदारीने वागण्याची गरज असल्याची चर्चा पुन्हा सुरू झाली आहे.