या दुर्घटनेनंतर चीनमधील खाण क्षेत्रातील सुरक्षा व्यवस्थेवर पुन्हा एकदा गंभीर प्रश्नचिन्ह निर्माण झाले आहे.

मिळालेल्या माहितीनुसार, युनान प्रांतातील हुइझे काउंटीमधील बायवू गावाजवळ ही दुर्घटना पहाटेच्या सुमारास घडली. खाणीत काम सुरू असताना अचानक जमिनीखालील भाग खचला आणि काही क्षणांतच मोठा भाग कोसळला. त्यामुळे सहा कामगार ढिगाऱ्याखाली अडकले. घटनेची माहिती मिळताच बचाव पथके घटनास्थळी दाखल झाली आणि युद्धपातळीवर बचावकार्य सुरू करण्यात आले.

अनेक तासांच्या अथक प्रयत्नांनंतर सर्व अडकलेल्या कामगारांना बाहेर काढण्यात आले. मात्र त्यापैकी पाच जणांना वाचवण्यात अपयश आले. एक जखमी कामगार सध्या रुग्णालयात उपचार घेत असून त्याची प्रकृती स्थिर असल्याचे सांगण्यात आले आहे. या घटनेमुळे मृतांच्या कुटुंबीयांवर दुःखाचा डोंगर कोसळला आहे.

बकरी ईदला सूर्याची हत्या करणाऱ्या असदचा एन्काऊंटर

प्राथमिक तपासात ही खाण बेकायदेशीररित्या चालवली जात असल्याची धक्कादायक बाब समोर आली आहे. आवश्यक परवानग्या, सुरक्षा उपाययोजना आणि नियमांचे पालन न करता उत्खनन सुरू असल्याचा संशय व्यक्त करण्यात येत आहे. त्यामुळे स्थानिक प्रशासन, खाण व्यवस्थापन आणि संबंधित अधिकाऱ्यांच्या भूमिकेची सखोल चौकशी सुरू करण्यात आली आहे. दुर्घटनेनंतर संपूर्ण परिसर सील करण्यात आला असून विशेष तपास पथक घटनास्थळी दाखल झाले आहे.

चीनमध्ये खाण दुर्घटनांची मालिका अद्याप थांबलेली नाही. काही दिवसांपूर्वीच एका कोळसा खाणीत झालेल्या मोठ्या अपघातात अनेक कामगारांचा मृत्यू झाला होता. त्यानंतर सरकारने सुरक्षा तपासणीचे आदेश दिले असतानाही पुन्हा अशी दुर्घटना घडल्याने प्रशासनाच्या कार्यक्षमतेवर प्रश्न उपस्थित होत आहेत. तज्ज्ञांच्या मते, अधिक उत्पादन आणि नफ्याच्या हव्यासापोटी अनेक ठिकाणी सुरक्षा नियमांकडे दुर्लक्ष केले जाते. त्याचा सर्वाधिक फटका कामगारांना बसतो. युनानमधील ही दुर्घटना त्याच निष्काळजीपणाचे आणखी एक भीषण उदाहरण मानली जात आहे.

दरम्यान, चीन सरकारने मृतांच्या कुटुंबीयांना मदतीचे आश्वासन दिले असून दोषींवर कठोर कारवाई करण्याचे संकेत दिले आहेत. मात्र वारंवार घडणाऱ्या अशा दुर्घटनांमुळे केवळ आश्वासने नव्हे, तर प्रत्यक्ष आणि कठोर अंमलबजावणीची गरज असल्याची भावना नागरिकांमधून व्यक्त होत आहे.