सामना संपल्यानंतर ईशान किशन आणि ईस्ट झोनचा उपकर्णधार वैभव सूर्यवंशी यांच्यातील मजेशीर संवाद चर्चेचा विषय ठरला. सामन्यात यशस्वी ठरलेल्या डीआरएसच्या निर्णयांचे श्रेय घेण्यावरून दोघांमध्ये मिश्कील टोलेबाजी झाली.

बीसीसीआयच्या देशांतर्गत क्रिकेटच्या सोशल मीडिया अकाउंटवर शेअर करण्यात आलेल्या व्हिडिओमध्ये ईशान म्हणाला, 'वैभवने प्रत्येक ठिकाणी रिव्ह्यूचे संपूर्ण श्रेय घेतले, याचा मला खूप आनंद आहे. अर्थात रिव्ह्यू घेणार मी होतो; पण तो आला आणि इतक्या आत्मविश्वासाने म्हणाला, 'मी तुमच्याकडे येतो.' त्यानंतर इंटरनेटवरही असेच होईल, वैभव!'

यावर वैभवनेही लगेच ईशानला उत्तर दिले. 'मैदानाबाहेर जाताना रिव्ह्यू कोण घेत होता, तेही सांगा,' असे म्हणत त्याने ईशानची फिरकी घेतली.

ईशान मैदानावर नसताना काही काळ वैभवने संघाचे नेतृत्वही केले होते. वैभवच्या नेतृत्वगुणांचे कौतुक करताना ईशान म्हणाला, 'हो, तो वैभवच होता. भविष्यातील कर्णधार कदाचित? पाहूया पुढे काय होते.'

वैभवचे संघातील योगदान अधोरेखित करताना ईशानने त्याचे कौतुक केले. 'संघात त्याचे असणे खूप चांगले आहे. तो केवळ चांगला खेळाडू नाही, तर खूप चांगला माणूसही आहे. तो संघातील प्रत्येकाची काळजी घेतो, मग तो ज्युनियर असो किंवा सिनियर,' असे ईशानने सांगितले.

यानंतर ईशानने वैभवला ज्युनियर म्हटल्याबद्दल मिश्कीलपणे माफीही मागितली. तो म्हणाला, 'ज्युनियर तर तूच आहेस… अरे, आता तू ज्युनियर राहिलेला नाहीस. सॉरी, सॉरी!' त्याचबरोबर वैभवने सध्याच्या कामगिरीपेक्षा आणखी धोकादायक खेळाडू बनावे, अशी अपेक्षाही त्याने व्यक्त केली.

दुसरीकडे, वैभवने अंतिम सामन्यात ईशानची फलंदाजी पाहण्याचा अनुभवही सांगितला. 'कर्णधाराची फलंदाजी पाहणे खूप मजेदार होते. आम्ही मैदानाबाहेर होतो आणि आतून ज्या प्रकारे त्याची फलंदाजी एन्जॉय करत होतो, ते खूप मजेदार होते. त्याने अंतिम सामन्यात अविश्वसनीय फलंदाजी केली,' असे वैभव म्हणाला.

ईशानच्या नेतृत्वाखाली खेळण्याचा अनुभवही वैभवने शेअर केला. 'अनेक लोक त्याला बराच काळ पाहत आले आहेत आणि त्याच्या नेतृत्वाखाली खेळले आहेत. त्याच्या नेतृत्वाखाली खेळणे खूप मजेदार होते. आम्ही खूप एन्जॉय केले,' असे त्याने सांगितले.

शेवटी ईशानने संघाच्या यशामागील महत्त्वाचा मंत्र सांगितला. 'सर्वात महत्त्वाचे म्हणजे एन्जॉय करणे. निकाल आपल्या हातात नसतो; मात्र संघ म्हणून एकत्रितपणे खेळाचा आनंद घेणे खूप महत्त्वाचे आहे. आणि यावेळी निकालही आपल्या बाजूने आला,' असे ईशानने म्हटले.