श्रीधर वेम्बू यांनी केले जाहीर
सॉफ्टवेअर क्षेत्रातील कंपनी झोहोचे मुख्य वैज्ञानिक आणि सहसंस्थापक श्रीधर वेम्बू यांनी मंगळवारी सांगितले की, वाढता खर्च आणि व्यवसायातील अनिश्चित परिस्थितीमुळे कंपनीला यंदा कर्मचाऱ्यांना नियमित वेतनवाढ देणे शक्य होणार नाही.
कंपनीने आपल्या विपणन खर्चातही कपात करण्याचा निर्णय घेतला आहे. सोशल मीडिया मंच एक्सवरील एका पोस्टमध्ये वेम्बू यांनी म्हटले की, सॉफ्टवेअर उद्योगातील व्यावसायिक परिस्थिती सध्या अनिश्चित आहे. कृत्रिम बुद्धिमत्तेचा (एआय) वाढता वापर आणि त्यासाठी आवश्यक असलेल्या पायाभूत सुविधांमुळे खर्चात मोठी वाढ झाली आहे.
डेटा सेंटरसाठी आवश्यक असलेल्या सर्व्हरच्या किमती जवळपास चारपट वाढल्याचे त्यांनी सांगितले. त्याचबरोबर एआयचा वापर वेगाने वाढत असल्याने कंपनीच्या परिचालन खर्चातही लक्षणीय वाढ झाली आहे. जागतिक भू-राजकीय परिस्थितीमुळेही व्यवसायासमोर अनेक आव्हाने निर्माण झाली आहेत.
वेम्बू यांनी आपल्या पोस्टमध्ये म्हटले, 'आम्ही आमच्या विपणन खर्चात कपात केली आहे. यंदा कर्मचाऱ्यांना नियमित वेतनवाढ देणे शक्य होणार नाही, हेही आम्ही त्यांना सांगितले आहे. हा निर्णय टाळता न आल्याबद्दल मी कर्मचाऱ्यांची माफी मागतो.'
मोठ्या प्रमाणावर कर्मचारी कपात टाळण्यासाठी कंपनी सर्वतोपरी प्रयत्न करेल, असेही त्यांनी स्पष्ट केले. मात्र, सध्या सॉफ्टवेअर उद्योगातील रोजगाराची परिस्थिती आव्हानात्मक असल्याचे त्यांनी नमूद केले. गेल्या १८ महिन्यांपासून झोहोच्या कर्मचारी संख्येत कोणतीही लक्षणीय वाढ झालेली नसल्याची माहितीही त्यांनी दिली.
राणीनं डाव जिंकला…सोमेश्वर साखर कारखाना निवडणुकीत अजितदादा पॅनल २१-०
जुनी मतदार यादी, हातावरच्या गोंदणामुळे २४ वर्षांनी सापडली हरवलेली बहीण
'हिंदूंच्याच दुकानातून बिर्याणी खरेदी करा' बंगालमध्ये लागले पोस्टर
जयशंकर यांचा इशारा शेतकऱ्यांची कसोटी |
कंपनीतील बहुतांश कर्मचारी सध्याची परिस्थिती समजून घेत आहेत, याबद्दल वेम्बू यांनी त्यांचे आभार मानले. कंपनी सध्या स्वतःमध्ये बदल घडवून आणण्याच्या प्रक्रियेत असल्याचे सांगताना ते म्हणाले, 'आम्ही स्वतःला नव्याने घडवण्याच्या प्रक्रियेत आहोत. पुढील तीन ते पाच वर्षे आमच्या या परिवर्तनाला किती यश मिळते, हे ठरवतील.'
दरम्यान, याच वर्षी मे महिन्यात श्रीधर वेम्बू यांनी कृत्रिम बुद्धिमत्तेमुळे तंत्रज्ञान कंपन्यांच्या बाजारमूल्यात होत असलेल्या वाढीबाबत चिंता व्यक्त केली होती. एआयविषयी गुंतवणूकदारांमध्ये वाढलेल्या उत्साहामुळे अनेक मोठ्या तंत्रज्ञान कंपन्यांचे मूल्यांकन अशा पातळीवर पोहोचले आहे, जिथे डॉट-कॉम आर्थिक फुगवट्यासारखी परिस्थिती दिसून येते, असे त्यांचे म्हणणे होते. त्या वेळी त्यांनी एनव्हिडिया, ॲपल, अल्फाबेट, मायक्रोसॉफ्ट, मेटा प्लॅटफॉर्म्स आणि मायक्रॉन टेक्नॉलॉजी यांसारख्या कंपन्यांचा उल्लेख केला होता. यापैकी अनेक कंपन्यांचे बाजारमूल्य त्यांच्या वार्षिक महसुलाच्या तुलनेत खूप जास्त असल्याचे त्यांनी म्हटले होते.