बॅडमिंटन आशिया चॅम्पियनशिपमध्ये भारतासाठी मिश्र चित्र पाहायला मिळाले. युवा खेळाडू आयुष शेट्टीने दमदार कामगिरी करत क्वार्टर फायनलमध्ये धडक मारली, तर अनुभवी खेळाडू पी.व्ही. सिंधू आणि एच.एस. प्रणय यांना स्पर्धेतून बाहेर पडावे लागले.

आयुष शेट्टीने तैपेईच्या चिन यू जेनवर सरळ गेममध्ये २१-१६, २१-१२ असा विजय मिळवत पुढील फेरी गाठली. अवघ्या ४१ मिनिटांत त्याने सामना जिंकत आपला शानदार फॉर्म कायम ठेवला. याआधी त्याने चीनच्या ली शी फेंगवर २१-१३, २१-१६ अशी मात केली होती. आता क्वार्टर फायनलमध्ये त्याचा सामना इंडोनेशियाच्या तिसऱ्या मानांकित जोनाथन क्रिस्टीशी होणार आहे.

दुसरीकडे, दोन वेळची ऑलिम्पिक पदक विजेती पी.व्ही. सिंधूला चीनच्या दुसऱ्या मानांकित वांग जी यी कडून सरळ गेममध्ये पराभव पत्करावा लागला. सिंधूने पहिल्या फेरीत मलेशियाच्या वोंग लिंग चिंगवर १५-२१, २१-११, २१-१९ असा विजय मिळवत पुनरागमन केले होते, मात्र पुढील फेरीत तिचा प्रवास थांबला.

पुरुष एकेरीत एच.एस. प्रणयलाही निराशा आली. दुसऱ्या फेरीत हाँगकाँगच्या वेंग होंग यांगकडून त्याला १२-२१, १९-२१ असा पराभव स्वीकारावा लागला. याआधी प्रणयने गुयेन है डांगवर २४-२२, २१-१२ असा विजय मिळवला होता.

मिश्र दुहेरीत तनिषा क्रॅस्टो आणि ध्रुव कपिला यांची जोडीही पराभूत झाली. चौथ्या मानांकित टोह ई वेई आणि चांग टेन जी या जोडीकडून त्यांना १३-२१, १४-२१ असा पराभव पत्करावा लागला.

दरम्यान, उन्नती हुड्डा पुढील फेरीत जपानच्या जागतिक क्रमवारीत नवव्या स्थानी असलेल्या टोमोका मियाजाकीशी सामना करणार आहे. महिला दुहेरीत प्रिया कोंजेंगबाम आणि श्रुती मिश्रा यांच्यासमोर जपानची पाचवी मानांकित जोडी उभी ठाकणार आहे.